Daxili işlər naziri, general-polkovnik Ramil Usubovun göstərişi ilə Baş Dövlət Yol Polisi İdarəsinin əməkdaşları ölkənin magistral yollarına yaxın ərazilərdə yaşayan vətəndaşlarla silsilə görüşləri davam etdirirlər.
Daxili İşlər Nazirliyinin (DİN) mətbuat xidmətindən Absheronxeber-ə bildiriblər ki, təhlükəsizliyin təmin edilməsi ilə bağlı təbliğat və təşviqat, maarifləndirmə xarakteri daşıyan növbəti tədbir Baş Dövlət Yol Polisi İdarəsinin (BDYPİ) Yol-Patrul Xidməti Alayının (YPXA) 1-ci taqımının təşkilatçılığı ilə Abşeron rayonunun Ceyranbatan qəsəbəsindəki 1 nömrəli tam orta məktəbdə şagird, müəllim, icra nümayəndəliyinin məsul əməkdaşları və jurnalistlərin iştirakı ilə təşkil edilib.
YPXA-nın 1-ci taqımının komandiri, polis mayoru Ürfət Şükürov görüşdə çıxış edərək baş verən piyadavurmaların ciddi narahatlıq doğurduğunu və belə görüşlərin keçirilməsinin yol qəzalarının qarşısının alınması məqsədi daşıdığını diqqətə çatdırıb, baş verə biləcək hadisələrin qarşısının alınması üçün profilaktiki tədbirlərin görülməsinin vacibliyini qeyd edib.
Bildirilib ki, yol-nəqliyyat hadisələrinin qarşısının alınması üçün hər kəs məsuliyyətini dərk etməli, piyadalar yalnız müəyyənləşdirilən yerlərdən istifadə etməli, həm özlərinin, həm də digər hərəkət iştirakçılarının həyat və sağlamlığının qorunmasına məsuliyyətlə yanaşmalıdırlar. Buna görə də hər kəs vətəndaşlıq mövqeyi sərgiləyərək ailədə, məktəbdə, iş yerlərində bununla bağlı fərdi söhbətlər aparmalıdır.
Baş Dövlət Yol Polisi İdarəsinin əməkdaşları, polis polkovnik-leytenantı İsa Deyistani və polis leytenantı Turan Daşdəmirova yol qəzalarının qarşısının alınması məqsədilə DİN-in rəhbərliyi tərəfindən respublika üzrə belə görüşlərin keçirilməsi barədə göstəriş verildiyini xatırladaraq, başlıca məqsədin vətəndaşları, xüsusən də şagirdləri maarifləndirmək, onları yol qəzalarının qurbanı olmaqdan qorumaq olduğunu diqqətə çatdırıblar.
Məktəbin direktoru Çinarə Atayeva yol polisləri ilə keçirilən bu görüşün şagirdlər üçün xüsusi əhəmiyyət daşıdığını bildirib. O, məktəbdə yol hərəkəti qaydaları ilə bağlı ilkin biliklərin tədris edildiyini vurğulayaraq, hamını, xüsusilə şagirdləri yol hərəkəti qaydalarına ciddi riayət etməyə səsləyib və müəllimlərin bu işdə fəal olmasının vacibliyini qeyd edib.
Digər çıxışlarda polisin keçirdiyi maarifləndirmə tədbirlərinin ictimaiyyət tərəfindən təqdirlə qarşılandığı bildirilib.
Sonda polis əməkdaşları şagirdlərə Baş Dövlət Yol Polisi İdarəsinin təşəbbüsü ilə çap olunmuş “Yol hərəkəti qaydaları əlifbası” adlı kitabça paylayıblar.
Şamo Əliyev