20 fevral 2018-ci il tarixində Xırdalan şəhər 15 saylı körpələr evi-uşaq bağçasında Xocalı faciəsinin 26-cı ildönümü ilə əlaqədar tədbir keçirildi.
Tədbirdə Abşeron Rayon İcra Hakimiyyətinin əməkdaşı Elnarə Umayeva, Xırdalan şəhər 1 saylı körpələr evi-uşaq bağçasın müdiri Vüsalə Məşədiyeva, bağçanın kollektivi və uşaq kontingenti iştirak etdi.
Anım tədbirində bağçanın müdiri Mətanət Novruzova bildirdi ki, XX əsrin ən qəddar və amansız terror hadisələrindən biri olan Xocalı soyqırımı yaddaşlardan heç zaman silinməyəcəkdir. Çünki Xocalıda baş verənlər təkcə Azərbaycan xalqına qarşı soyqırımı deyil, bəşəriyyət, insanlıq əleyhinə törədilmiş qanlı cinayətdir. Bu faciənin soyqırım kimi tanınması üçün dövlətimiz, diasporumuz tərəfindən görülən işlər barədə danışan müdirə Prezident İlham Əliyevin işğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında imzaladığı Sərəncamı vurğuladı. M.Novruzova vurğuladı ki, Cocuq Mərcanlıya qayıdış xalqımızda, o cümlədən Azərbaycanın 48 rayonunda məskunlaşan xocalılılarda Dağlıq Qarabağ münaqişəsinin ədalətli həlli, işğal olunmuş torpaqlarımızın azad edilərək ölkəmizin ərazi bütövlüyünün bərpası, eləcə də o torpaqlara qayıdış ümidini daha da möhkəmləndirdi.
Abşeron Rayon İcra Hakimiyyətinin əməkdaşı Elnarə Umayeva və 1 saylı körpələr evi-uşaq bağçasının müdiri Vüsalə Məşədiyeva çıxış edərək xalqımıza qarşı törədilən soyqırımı və deportasiyalar barədə həqiqətləri ilk öncə övladlarımıza, sonra bütün dünyaya çatdırmağın, gələcək nəsillərə əyani surətdə göstərməyin və ictimaiyyət arasında onların təbliğinin genişləndirilməsinin vacibliyini vurğuladılar.
Sonda bağçanın balaca fidanlarının ifasında bədii kompozisiya nümayiş etdirildi.
Tural Kazımlı
