Xırdalan şəhər 5 nömrəli tam orta məktəbdə Beynəlxalq Ana Dili Gününə həsr olunmuş “Ana dilimizi sevək, qoruyaq” devizi altında tədbir keçirilib.
Toplantıda məktəbin direktoru Şahin Yusifov, rayon Ağsaqqallar Şurasının sədri Nadir Ağayev, Bakı Mühəndislik Universitetin müəllimləri Ülvi Babasoy, Bəhman Məmmədov, Abşeron RTŞ-nın əməkdaşı Aysel Tahirova, məktəbin pedoqoji kollektivi və valideynlər iştikar ediblər.
Tədbiri giriş sözü ilə açan məktəbin direktoru Şahin Yusifov bildirib ki, dil hər bir millətin maddi və mənəvi irsini qoruyan və inkişaf etdirən ən mühüm və ən güclü vasitədir. Hər bir insan öz ana dilini yaxşı bilməli və onu qorumalıdır. Ana dili insanın mənəvi aləminin zənginləşməsində, dünyagörüşünün genişlənməsində, mükəmməl təhsil almasında, öz soydaşları ilə ünsiyyət qurmasında mühüm rol oynayır. Ana dili millətin özünəməxsusluğunu qorumaqla yanaşı, tərcümə vasitəsilə başqa xalqların mədəni irsi ilə tanış olmağa, onlarla ünsiyyət qurmağa imkan yaradır.
Görüşdə çıxış edən N.Ağayev qeyd edib ki, Azərbaycan dili xalqımızın milli-mənəvi sərvəti olmaqla bərabər, eyni zamanda, dövlət müstəqilliyimizin əsas amili, rəmzidir. Zəngin söz ehtiyatına, gözəl ahəngə, sabit qrammatik quruluşa malik ana dilimiz ulu babalardan xalqımıza miras qalmış ən qiymətli sərvətdir. Bütün xalqlarda olduğu kimi, Azərbaycan xalqının da dili onun milli varlığını müəyyən edən başlıca amillərdəndir. Dilimiz xalqın keçdiyi bütün tarixi mərhələlərdə onunla birgə olmuşdur. Ana dilimiz xalqın ən ağır günlərində belə onun milli mənliyini, xoşbəxt gələcəyə olan inamını qoruyub saxlamış, möhkəmləndirmişdir.
Tədbirdə Ü. Babasoy və B.Məmmədov çıxış edərək qeyd ediblər ki, tarixin müxtəlif mərhələlərində ona qarşı olan haqsızlıqlara, təzyiq və təhriflərə baxmayaraq dilimiz öz saflığını qoruyub saxlamışdır. İnkişaf etmiş zəngin dil mədəniyyətinə sahib olan xalq əyilməzdir, böyük gələcəyə malikdirlər. Ona görə də ulu babalardan xalqımıza miras qalmış bu qiymətli milli sərvəti hər bir azərbaycanlı daim göz bəbəyi kimi qorumalıdır.
Şagirdlər ana dilimizə həsr edilən şeirlər, müdrik kəlamlar, mahnılar söyləyib və ədəbi-bədii kompozisiyalar nümayiş etdiriblər.
