Mehdiabad 18 saylı uşaq bağçasında Xocalı Soyqırımının 26-cı ildönümü anılıb Tədbir iştirakçıları əvvəlcə torpaqlarımızın və ərazi bütövlüyümüzün qorunması yolunda canlarından keçmiş şəhidlərimizin, Xocalı faciəsi qurbanlarının ruhunu bir dəqiqəlik sükutla yad ediblər.
Sonra bağçanın müdiri Aygün Həsənova giriş sözü söyləyib. O, Xocalı hadisələri haqqında məlumat verərək ermənilərin zaman-zaman Azərbaycan xalqının başına açdığı müsibətlərdən, 26 il əvvəl ermənilərin Xocalıda törətdikləri vəhşiliklərdən danışıb. XX əsrin sonunda baş vermiş Xocalı faciəsi təkcə Azərbaycan xalqına deyil, insanlığa, bəşəriyyətə qarşı yönəlmiş ən ağır cinayətlərdən biridir. A.Həsənova vurğulayıb ki, siyasi – hüquqi qiyməti Ümummilli Lider Heydər Əliyev tərəfindən verilmiş bu faciə haqqında əsl həqiqətlərin bütün dünyaya çatdırılması, dünya dövlətləri və beynəlxalq təşkilatlar tərəfindən faciənin soyqırımı kimi tanınması istiqamətində ölkə Prezidenti cənab İlham Əliyev uğurlu siyasət aparır. Bu siyasətin nəticəsində beynəlxalq miqyasda Xocalı soyqırımı haqqında obyektiv fikir formalaşır. Eyni zamanda, bu cür tədbirlərlə Heydər Əliyev Fondunun vitse-prezidenti Leyla Əliyevanın təşəbbüsü ilə başladılan “Xocalıya ədalət” beynəlxalq təşviqat kampaniyasına gənc nəslimizin dəstəyini bir daha ifadə etmiş oluruq.
Çıxışlardan sonra bağçanın uşaqları Xocalı ilə əlaqədar səhnəciklər təqdim edib, şeirlər söyləyərək, müxtəlif ədəbi-bədii kompozisiyalar nümayiş etdiriblər.