Məmmədli kənd 10 saylı körpələr evi-uşaq bağçasında Xocalı soyqırımının 26-cı ildönümünə həsr olunmuş tədbir keçirilib.
Önçə bağçanın körpə fidanları Xocalı soyqırımının 26-cı ildönümü münasibətilə Şəhidlər Xiyabanını ziyarət edib. Uşaqlar Şəhidlər xiyabanına gələrək Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının xatirəsini yad edib, məzarları üzərinə güllər düzüb, şəhidlərin əziz xatirəsinə həsr olunmuş şeirlər söyləyiblər.
Bağçada davam etdirilən tədbirdə öncə faciə qurbanlarının xatirəsi bir dəqiqəlik sükutla anılıb.
Bağçanın müdirəsi Vəfa Rəsulova Xocalıda baş verən hadisəni insanlığa qarşı törədilmiş ən qəddar və dəhşətli faciə adlandırıb. O bildirib ki, Xocalıda törədilən soyqırımı dünyada analoqu olmayan terror aktıdır. Bu, bəşəriyyətə, insanlığa qarşı törədilən bir qətliamdır: “Çünki ana övladının, uşaqlar valideynlərinin, qardaş bacının, nəvələr baba-nənənin gözü qarşısında qətlə yetirilib. Dünyada belə bir dəhşətli hadisə heç bir xalqda, heç bir dövrdə baş verməyib”.
Anım mərasimində “Xocalı soyqırımı” adlı film nümayiş etdirildikdən sonra bağçanın balaca fidanları faciəyə həsr olunmuş şeirlər söyləyiblər.