İlk dəfə Azərbaycan dilində “Mədəni bitkilərin mənşəyi” dərsliyi çapdan çıxıb.
Azərbaycan Milli Elmlər Akademiyasından (AMEA) bildirilib ki, bu dərslik mədəni bitkilərin botaniki-coğrafi xüsusiyyətləri, nadir növləri, mənşəyi, yayılma arealı, kimyəvi tərkibi, əhəmiyyəti, sistematikası, çoxnövçülük mərkəzləri və onların mühafizəsi haqqında məlumatları əks etdirir.
Naxçıvan Dövlət Universitetinin dosenti, biologiya üzrə fəlsəfə doktoru Hilal Qasımov, AMEA Naxçıvan Bölməsinin Bioresurslar İnstitutunun əməkdaşları - biologiya üzrə fəlsəfə doktorları Ramiz Ələkbərov, Mürsəl Seyidov, Abbas İsmayılov və elmi işçi Surə Rəhimovanın birgə hazırladıqları elmi, metodik və pedaqoji cəhətdən dəyərli olan bu dərslik tədris proqramını tam əhatə edir.
Yeni nəşr mədəni bitkilərin yayılma mərkəzlərinə dair əsas məlumat bazası olmaqla yanaşı, biomüxtəlifliyin qiymətləndirilməsi, ətraf mühitin mühafizəsi, həmçinin orta və ali məktəblərin tədris proqramlarının həyata keçirilməsi üçün qiymətli mənbədir.
Dərslikdə mənşə mərkəzləri və bu mərkəzlər üçün xarakterik olan spesifik xüsusiyyətlər haqqında ətraflı məlumat verilib.