Ölkəmizdə səfərdə olan Almaniyanın Brandenburq Texniki Universitetinin (BTU) bir qrup alimi Azərbaycan Texniki Universitetinin (AzTU) professor-müəllim heyəti və tələbələri ilə görüşüb.
AzTU-dan bildirilib ki, görüşdə prorektor İlham Pirməmmədov təmsil olunduğu ali məktəbin Almaniyanın universitetləri ilə əməkdaşlığından danışıb. Prorektor AzTU-nun Almaniyanın bir neçə universiteti ilə birbaşa, bir neçə universiteti ilə müxtəlif layihələr çərçivəsində əlaqələrinin mövcud olduğunu söyləyib.
AzTU ilə əməkdaşlıqdan məmnun olduqlarını bildirən professor Silvo Simon və professor Peter Biegel “ERASMUS+” layihəsi çərçivəsində BTU-da son illər həyata keçirilən elmi-texniki yeniliklər haqqında görüş iştirakçılarına məlumat veriblər. Bundan əlavə, görüşdə iki universitet arasında əməkdaşlığın müxtəlif istiqamətləri müzakirə olunub. Qonaqlar AzTU-nun nəqliyyat və maşınqayırma fakültələrinin tələbələrindən ibarət komandanın “Ecoshell Marafon” beynəlxalq yarışmasında təmsil olunmasını təklif ediblər. Bildirilib ki, bununla bağlı BTU azərbaycanlı tərəfdaşlarına hər cür dəstək göstərməyə hazırdır.
“Ecoshell Marafon” beynəlxalq yarışması tələbələrin özləri tərəfindən hazırlanan avtomobillərin yarışmasıdır. Burada tələbələrin texniki-praktik biliklərə yiyələnməsi ilə yanaşı, həm də innovativ texnologiyanın formalaşdırılması üçün əlverişli mühit yaradılır.
Qeyd edək ki, almaniyalı alimlər martın 16-dək AzTU-da müxtəlif seminarlara, müzakirələrə və görüşlərə qatılacaq, fakültə və kafedralarla tanış olacaqlar. Həmçinin almaniyalı elm adamlarının ölkəmizin görməli yerlərinə gəzintisi, həmçinin zavod və müəssisələrə səfərləri də təşkil olunacaq.
