Xırdalan 2 saylı məktəbin şagirdləri əsgərlərə 2400 kitab göndərdi...
Tarix:20-04-2018, 11:23
Füzuli rayonu ərazisində yerləşən N saylı hərbi hissənin və Xırdalan şəhər 2 nömrəli tam orta məktəbin birgə təşkilatçılığı ilə həyata keçirilən layihənin adı “Əsgərə xatirə kitabı və xatirə sözləri”dir.
Aprel döyüşlərinin iştirakçıları Xırdalan şəhərinə səfər ediblər. İlk olaraq Xırdalan şəhər 2 nömrəli tam orta məktəbin şagirdləri ilə görüşən döyüşçülər "Əsgərə xatirə kitabı" aksiyasında iştirak edən məktəblilərə təşəkkür məktubları veriblər.
Daha sonra döyüşçülər məktəbin akt zalında təşkil olunan tədbirə qatılıblar.
Məktəbin direktoru Ədalət Camalova bildirib ki, Abşeron Rayon İcra Hakimiyyətinin xüsusi diqqət və qayğısı ilə əhatə olunan Abşeron məktəblərinin qarşısında gənc nəslin hərbi-vətənpərvərlik ruhunda tərbiyəsi sahəsində məsul və təxirəsalınmaz vəzifələr qoyulması təsadüfi deyil. Bu vəzifələrin yerinə yetirilməsi ilə son dövrlərdə məktəblərimizdə şagirdlərin hərbi-vətənpərvərlik tərbiyəsi xeyli yüksəlib. Hərbi-vətənpərvərlik tərbiyəsinin faktlar və zəngin əyani vasitələr əsasında aparılması tərbiyə işinin bu mühüm sahəsi üzrə maraqlı forma və üsulları da meydana çıxarıb, məktəblərlə hərbi hissələr arasında əlaqələrin yaradılması daha da gücləndirilib. Bu sahədə məktəblərdə toplanmış qabaqcıl təcrübə hərbi-vətənpərvərlik tərbiyəsini daha məzmunlu və məqsədəuyğun şəkildə aparmağa imkan verir. Direktor çıxışının sonunda onu da vurğulayıb ki, məktəbin şagirdləri bu yaxınlarda Cəbrayıl rayonunun işğaldan azad edilmiş Cocuq Mərcanlı kəndinə səfər edəcək, səfər cərcivəsində əsgər və zabitlərlə görüşəçəklər
Layihənin rəhbəri, təhsil üzrə ekspert Nuranə Şıxəliyeva vurğulayıb ki, Bakıdan başlayan “Əsgərə kitab” layihəsi ilk olaraq Xırdalan şəhərində davam edir. “Əziz əsgər qardaşım, vətən sənə əmanət!” xatirə sözləri ilə yazılan kitabların hərbi hissələrə göndərilməsinə başlanılıb.
Layihənin məqsədi məktəblilərin xüsusən də vətənpərvərlik mövzusunda olan kitabları toplayaraq cəbhə bölgəsində xidmət edən əsgərlərə yollamaqdır. Şagirdlər də bu layihəyə çox böyük maraq göstərirlər. Artıq 2400-dən çox kitab toplanaraq cəbhə bölgəsinə yola salınıb. Hər bir kitabın içərisində isə şagirdlərin əsgərlərimizə yazdıqları ürək sözləri yer alır.
Füzulidə yerləşən N saylı hərbi hissənin polkovnik-leytenantı Seymur Habibullahov vurğulayıb ki, şagirdlərin hərbi-vətənpərvərlik hisslərinin artırılmasında hərbçilərlə canlı ünsiyyət də mühüm rol oynayır. Hərbi dərslər zamanı şagirdlərin hərbi hissələrə aparılması və onların əsgərlərlə söhbətlər etməsi də yeni¬yetmələrin formalaşmasında, onların vətənə bağlılığının artırılmasında və vətənin, torpağın müdafiəsində durmaq kimi hisslərinin inkişaf etdirilməsində böyük əhəmiyyətə ¬malikdir.Bu cür layihələr vətənə sevgi və vətənpərvər hisslərin aşılamasında böyük rol oynayır. Aksiya mütəmadi olaraq davam etdiriləcək. Toplanmış kitablar müxtəlif hərbi hissələrə göndəriləcək.
Görüşdə şagirdlərin ifasında vətənə , millətə, dövlət atributlarına aid vətərnpərvərlik mövzusunda şeir və mahnılar səsləndirilib, milli rəqs nümünələri nümayiş olunub. Tədbirdə həmçinin vətənpərvərlik mövzusunda şagirdlər tərəfindən bir neçə səhnəciklər nümayiş etdirilib.