Bu gün ki məşğələdə körpə fidanlara bağçanın tərbiyyəçi müəlliməsi İradə Zeynalova tərəfindən “Ev heyvanları və vəhşi heyvanlar” tədris edilib.
Əvvəlcə uşaqlar tərbiyəçinin “Ev heyvanları və vəhşi heyvanlar” haqqında verdiyi sualları cavablandıraraq biliklərini nümayiş etdiriblər.
Sonra tədqiqatı aparmaq üçün qruplarla iş aparılıb. Körpə fidanlar 4 qrupa bölünüb, qrup daxilində lider seçiblər. Qruplara tapşırıqlar verilib.
İ.Zeynalova məşğələdə yeni təlim üsullarından və əyani vasitələrdən istifadə etdib. Böyük qrupda açıq məşğələ zamanı yeni mövzunun öyrənilməsi üçün motivasiya qurulub, uşaqlara qrup işində düşündürücü suallar verilib. Uşaqlar məşğələ zamanı həm öyrənib, həm də əyləniblər.
Qruplar öz işlərini təqdim etdikdən sonra tərbiyəçi müəllim tərəfindən onların işi müzakirə olunub.
Məşğələdən sonra onun təhlili aparılıb. Bağçanın müdirəsi Könül İbrahimova çıxışında "açıq məşğələ"nin yaxşı keçdiyini vurğulayıb. Bildirilib ki, bağçada uşaqlara canlı və cansız aləmlə tanışlıq, təbiətin qanunauyğunluqlarını başa salmaqla yanaşı, onlarda vətənpərvərlik, canıyananlıq, mehribanlıq, tapşırıqlara əməl etmək, təmizkarlıq, qətiyyətlilik, doğruçuluq, dostluq, yoldaşlıq kimi mənəvi-əxlaqi keyfiyyətlərin formalaşdırılması istiqamətində ardıcıl iş aparılır.
Aparılan təlim-tərbiyə işinin nəticəsində tədbirin yüksək səviyyədə hazırlandığını, bağçada bir çox istiqamətlərdə müsbət təcrübə toplandığını qeyd edən K.İbrahimova bildirib ki, bu tədbirin ərsəyə gəlməsində tərbiyəçilərin xüsusi rolu var.
Şamo Əliyev
