Abşeron rayon Xırdalan şəhər 23 saylı körpələr evi-uşaq bağçasında Ümummilli Lider Heydər Əliyevin anadan olmasının 95-ci ildönümünə həsr olunmuş qruplar arası əyləncəli idman yarışı keçirilib. Əvvəlcə ümummilli liderin Xırdalan şəhərindəki abidəsi önünə gül dəstələri qoyan bağçanın pedoqoji kollektivi və körpə fidanlar sonra Heydər Əliyev Mərkəzində Ulu Öndərin həyat və fəaliyyətini əks etdirən stendlərə və video-çarxa baxıblar.
Mərkəzlə tanışlıq mərasimindən sonra bağçanın həyətində keçirilən idman yarışı Ümummilli liderin xatirəsinin bir dəqiqəlik sükütla yad edilməsi ilə başlanılıb.
Tədbiri giriş sözü ilə açan bağçanın müdirəsi Aybəniz Sadıxova Ulu Öndərin həyat və fəaliyyəti haqda ətraflı məlumat verib.
A.Sadıxova bildirib ki, keçirilən idman yarışı fiziki tərbiyənin tərkib hissəsi olmaqla şəxsiyyətin hərtərəfli inkişafının mühüm vasitəsidir. Şəxsiyyətin mühüm mənəvi keyfiyyətlərindən biri olan fiziki tərbiyə uşaqların səhətinin mühafizəsi və möhkəmləndirilməsinə, onların mükəmməl fiziki inkişafına yönləndirilmiş, elmi cəhətdən əsaslandırılmış vasitələrlə uşaq orqanizminin düzgün inkişaf etdirmə prosesidir. Elə bağçada verilən idman aylığının əsas məqsədi də uşaqlara öyrənmə həvəsini idmana olan marağı stimullaşdırmaqdan ibarətdir. Bu yarışların məqsədi odur ki, uşaqlar yarışın nə demək olduğunu öyrənib, qalibiyyətin zövqünü yaşasınlar. Qalib olmaq üçün çalışırlar, amma zaman – zaman qalibiyyət də var, məğlubiyyət də. Uşaqlar bunların fərqini anlayırlar, hiss edirlər.
Çıxışlardan sonra bağçanın tərbiyəçiləri Sadət Saadova, Xumar Hüseyinova və Ellada Babayevanın təşkilatçılığı ilə hazırlanan yarışda bağçanın azərbaycan və rus bölməsinin balaca fidanları 2 qrupa bölünərək müxtəlif estafetlərlə yarışıblar. İdman tədbirində bağçanın “Günəş” və “Nərgiz” komandaları mübarizə aparıblar.
Komandalararası yarış bir neçə mərhələdə keçirilib.
Hər yarış arası bağçanın balaca fidanları hazırladıqları bayram şeirləri və rəqsləri ilə idmançıları ruhlandırıblar.
Yarışa məktəbəqədər təhsil müəssisənin müdirəsi və bağçanın metodisti hakimlik ediblər.
Müxtəlif yaş qruplardan olan uşaqlar yarışlarda öz məharətlərini göstərərək həm əyləniblər, həm də yeni bilik və bacarıqlar qazanıblar.
Balacaların yarışda xüsusi fəallığı və əzimkarlığı hamı tərəfindən rəğbətlə və alqışlarla qarşılanıb.
Bir-birindən maraqlı və əyləncəli idman növləri üzrə yarışan komandaların sonda yekun qiymətləndirilməsi aparılıb.
Hakimlər tərəfindən bir ballıq sistem üzrə qiymətləndirilən idman tədbirində “Günəş” komandası “Nərgiz”komandasını xal etibarı ilə üstələyərək yarışın qalibi olub.
Sonda yarış iştirakçıları bağçanın müdirəsi A.Sadıxova tərəfindən kubok, diplom və qiymətli hədiyəllərlə təltif olunub və birlikdə xatirə şəkli çəkdirilib.