Xırdalan şəhər 24 saylı körpələr evi-uşaq bağçasında Azərbaycan Xalq Cümhuriyyətinin 100 illik yubileyinə həsr olunan tədbir keçirilib. Tədbiri açıq elan edən bağçanın müdüri Leyla Bayramova bildirib ki, Ali Baş Komandan İlham Əliyevin sərəncamına əsasən 2018-ci il “Azərbaycan Xalq Cümhuriyyəti İli” elan edilib. Xalq Cümhuriyyətinin yaranması, fəaliyyəti haqqında tədbir iştirakçılarına geniş məlumat verilərək bildirilib ki, Cümhuriyyətin 100 illik yubileyi ölkəmizin hər bir guşəsində olduğu kimi Abşeron rayonunda fəaliyyət göstərən məktəbəqədər təhsil ocaqlarında da geniş qeyd edilir. Bu gün müasir Azərbaycan Respublikasının Xalq Cümhuriyyətinin varislik prinsipinə əsaslandığı və ümummilli liderimiz Heydər Əliyevin siyasi kursunu əsas götürərək dövlətçilik yolunda qətiyyətlə irəliləməsi xüsusi vurğulanıb.
Çıxış edənlər Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə ölkəmizin artıq dünya dövlətləri arasında özünəməxsus yer tutduğunu, iqtisadi cəhətdən inkişaf etməkdə olan bir dövlətə çevrildiyini və bu gün respublikamızda dövlətçilik ənənələrinin ləyaqətlə qorunaraq gələcək nəsillərə ötürüldüyünü tədbir iştirakçılarının diqqətinə çatdırıblar.
Sonra uşaqlar səhnəyə dəvət olunublar. Onlar Vətənə, anaya, müəllimə, ana dilimizə aid şeirlər söyləyib, bir neçə kompozisiya nümayiş etdiriblər. Tədbirdə uşaqların ifasında milli rəqslərimizlə yanaşı, körpə fidanların nümayiş etdirdikləri idman nömrələri də maraqla qarşılanıb.
Tural Kazımlı