Xırdalan şəhər 15 nömrəli körpələr evi-uşaq bağçasının məktəbəhazırlıq qrupunda “Riyaziyyat”dan yekun açıq məşğələ keçirildi.
Zala daxil olan uşaqlar tədbir iştirakçılarını salamladıqdan sonra məşğələ başladı. Bağçanın uşaqları ilə "açıq məşğələ"ni Yeganə Rzayeva aparırdı.
Məşğələdə tərbiyəçi uşaqlarla keçilən mövzunu (10 dairəsində möhkəmləndirmə) təkrarladı. Uşaqlar bu mövzulara aid müxtəlif tapşırıqları icra etdilər. Tərbiyəçi yeni “Məsələ həlli” mövzusu haqqında məlumat verdi. Məşğələdə həmçinin yeni təlim üsullarından və əyani vasitələrdən istifadə edildi. Açıq məşğələ zamanı yeni mövzunun öyrənilməsi üçün motivasiya qurulub, uşaqlara qrup işində düşündürücü suallar verilib. Uşaqlar məşğələ zamanı həm öyrənib, həm də əyləniblər.
Məşğələdə uşaqların ifasında mahnı, rəqs və səhnəciklərdən ibarət nömrələrlər nümayiş olundu.
Məşğələdən sonra onun təhlili aparıldı. Bağçanın müdirəsi Mətanət Novruzova çıxışında "açıq məşğələ"nin yaxşı keçdiyini vurğuladı. Aparılan təlim-tərbiyə işinin nəticəsində tədbirin yüksək səviyyədə hazırlandığını, bağçada bir çox istiqamətlərdə müsbət təcrübə toplandığını qeyd edən Mətanət Novruzova bildirdi ki, bu tədbirin ərsəyə gəlməsində tərbiyəçilərin xüsusi rolu var.
Bildirildi ki, kurikulum əsasında keçirilən “Riyaziyyat” fənni üzrə açıq məşğələdə məqsəd, yuxarı yaş qrupunda tərbiyə alan uşaqların il ərzində riyaziyyat biliklərinə nə dərəcədə yiyələndiklərini aşkara çıxarmaq, bu sahədə toplanmış təcrübəni bölüşmək idi.
Tural Kazımlı