Xırdalan şəhər 8 nömrəli məktəb Bakı Mühəndislik Universitetində Azərbaycan Xalq Cümhuriyyətinin yaranmasının 100 illiyinə həsr olunmuş tədbir keçirdib.
Tədbirdə məktəbin direktoru Xatirə Şabanova Azərbaycan Xalq Cümhuriyyətinin tariximizdəki müstəsna yeri və rolundan danışıb.
Direktor Prezident İlham Əliyevin “Azərbaycan Xalq Cümhuriyyətinin 100 illik yubileyi haqqında” Sərəncamının əhəmiyyətini vurğulayıb.
Cəmi 23 ay yaşamasına baxmayaraq Azərbaycan Xalq Cümhuriyyətinin dövlətçilik tariximizdə şərəfli iz qoyduğunu qeyd edən X.Şabanova bildirib ki, Cümhuriyyət milli təhsil sistemimizin qurulmasına mühüm töhfələr verib. Elm və təhsilimizin inkişafında müstəsna rolu olan indiki Bakı Dövlət Universiteti Cümhuriyyət dövründə yaradılıb.
Prezident İlham Əliyevin apardığı siyasətin uğurlu nəticələrindən danışan direktor müasir müstəqil Azərbaycanın sürətlə inkişaf etdiyini vurğulayıb.
Bayram tədbirində digər çıxış edənlər diqqətə çatdırıblar ki, Cümhuriyyət xalqımızın qəlbində azadlıq və istiqlal duyğularını gücləndirməklə gələcək müstəqilliyimiz üçün etibarlı zəmin hazırlayıb, müsəlman xalqlarına müstəmləkəçilikdən xilas olmağın yolunu göstərib. Qısa müddətdə tarixi bir missiyanı yerinə yetirən Azərbaycan Xalq Cümhuriyyəti genişmiqyaslı demokratik islahatlar həyata keçirib. Avropanın bir çox ölkələrindən xeyli əvvəl qadınlara seçib-seçilmək hüququ verən Cümhuriyyət bununla bütün dünya demokratiyasına böyük töhfə verib.
Tədbirdə məktəblilər və universitetinin tələbələri Cümhuriyyətin 100 illiyinə həsr olunmuş ədəbi-bədii kompozisiya nümayiş etdiriblər.
Yazını hazırladı: Xırdalan şəhər 8 nömrəli məktəbin müəllimi Gülnarə Quliyeva
