Azərbaycan Respublikasının Təhsil nazirliyinin təşkilatçılığı ilə “Azərbaycan Xalq Cumhuriyyəti İli”nə həsr olunmuş intellektual oyun üzrə 2018-ci ildə regional məktəb çempionatını keçirilir.
Quba şəhərində 26 may 2018-ci il tarixində keçirilən çempionatda Quba, Qusar, Xaçmaz, Şabran,Siyəzən, Xızı, Abşeron, Qubadlı rayonlarının məktəbliləri iştirak edib.
“Azərbaycan Xalq Cumhuriyyəti İli”nə həsr olunmuş intellektual oyun üzrə məktəb çempionatı Respublikanın ümumtəhsil məktəblərinin 8-10-cu sinif şagirdləri arasında keçirilib. Çempionatın keçirilməsində əsas məqsəd gənclərin intellektual və yaradıcılıq bacarıqlarının inkişafına kömək etmək, yüksək yaradıcılıq qabiliyyətinə, intellektual potensiala və müxtəlif sahələrdə dərin biliklərə malik gəncləri aşkar etmək, onların inkişaf etdirilməsinə şərait yaratmaqdan ibarətdir.
Çempionatın keçirilməsində əsas vəzifə Azərbaycan Respublikasının müxtəlif regionlarında ən güclü məktəb komandalarını müəyyən etmək, məktəblilərin intellektual və yaradıcılıq səviyyəsinin yüksəldilməsinə nail olmaqdır.
Regional məktəb çempionatında 36 sual səslənib və hər biri 12 sualdan ibarət olan 3 tur oynanılıb.
Komandaların tərkibi 6 əsas və 2 ehtiyyat oyunçulardan ibarət olub.
Yekun nəticələrə görə, Abşeron komandası qalib adını qazanıb. İkinci-üçüncü yerləri Xızı və Quba məktəblilərinin komandaları tutublar.
Sonda regional məktəb çempionatının zona üzrə qalib çıxmış komandalar Azərbaycan Respublikası Təhsil Nazirliyi tərəfindən qiymətli hədiyyələrlə mükafatlandırılıb.