Ətraf aləmlə tanışlıq uşaqların qavrayış və təsəvvürlərinin, təfəkkür və təxəyyüllərinin inkişafına təkan verir. Bu səbəbdən də Abşeron rayonunda fəaliyyət göstərən bağçalarda ətraf aləmlə tanışlıq fənni tədris edilir. Uşaqların ətraf aləm, təbiət və cəmiyyət haqqında təsəvvürlərini düzgün formalaşdırmaq üçün bu fənn böyük önəm daşıyır.
İyunun 7-də Xırdalan şəhər 26 saylı körpələr evi-uşaq bağçasının tərbiyəçi müəllimi Pərvanə Məmmədova tərəfindən məktəbəhazırlıq qrupunda Ətraf aləmlə tanışlıq fənnindən "Səma cisimləri (Planetlər) ” mövzusunda açıq məşğələ keçirilib.
Əvvəlcə uşaqlar tərbiyəçinin “Planetlər” haqqında verdiyi sualları cavablandıraraq biliklərini nümayiş etdiriblər.
Sonra tədqiqatı aparmaq üçün qruplarla iş aparılıb. Körpə fidanlar 4 qrupa bölünüb, qrup daxilində lider seçiblər. Qruplara tapşırıqlar verilib.
P.Məmmədova məşğələdə yeni təlim üsullarından və əyani vasitələrdən istifadə etdib.Açıq məşğələ zamanı yeni mövzunun öyrənilməsi üçün motivasiya qurulub, uşaqlara qrup işində düşündürücü suallar verilib. Uşaqlar məşğələ zamanı həm öyrənib, həm də əyləniblər.
Qruplar öz işlərini təqdim etdikdən sonra tərbiyəçi müəllim tərəfindən onların işi müzakirə olunub.
Məşğələdən sonra onun təhlili aparılıb. Bağçanın müdirəsi Nigar Səfərova çıxışında "açıq məşğələ"nin yaxşı keçdiyini vurğulayıb. Bildirilib ki, bağçada uşaqlara canlı və cansız aləmlə tanışlıq, təbiətin qanunauyğunluqlarını başa salmaqla yanaşı, onlarda vətənpərvərlik, canıyananlıq, mehribanlıq, tapşırıqlara əməl etmək, təmizkarlıq, qətiyyətlilik, doğruçuluq, dostluq, yoldaşlıq kimi mənəvi-əxlaqi keyfiyyətlərin formalaşdırılması istiqamətində ardıcıl iş aparılır.
"Açıq məşğələ"nin dinləyicilərindən Abşeron RİH-in əməkdaşı Samirə İsmayılzadə, 1 nömrəli körpələr evi-uşaq bağçasının müdiri Vüsalə Məşədiyeva, 15 nömrəli körpələr evi-uşaq bağçasının müdiri Mətanət Novruzova, 24 nömrəli körpələr evi-uşaq bağçasının müdiri Leyla Bayramova və 25 nömrəli körpələr evi-uşaq bağçasının müdiri Ofelya Mustafayeva çıxış edərək "açıq məşğələ"nin yüksək səviyyədə keçdiyini, "Səma cisimləri (Planetlər) ” ilə bağlı bağçada uşaqlarla geniş iş aparıldığını, nəticədə onlarda bu sahədə kifayət qədər aydın təsəvvürlər formalaşdığını qeyd edərək, bağçanın rəhbərliyinə, tədbirin təşkilində əməyi olanlara minnətdarlıqlarını bildiriblər.
Tural Kazımlı