İnsan doğulduğu gündən həyatında "ilk"lər səhifəsi açılmağa başlayır. İlk təbəssüm, ilk addım, bağça illərinin ilk günü, ilk ayrılıq acısı-bağça ilə vida günü, məktəb həyatının ilk və son günü... Bu siyahını uzatmaq da olar. Amma onların arasında ən unudulmaz günlərdən biri qayğısız uşaqlıq çağı ilə son görüş, doğma bağça ilə vida günüdür. Rayon Mədəniyyət Mərkəzində Xırdalan şəhər 25 saylı körpələr evi- uşaq bağçasının keçirdiyi tədbir də məhz bu günə həsr olunmuşdu.
Tədbirdə balaca fidanlar vətənə, müəllimə, ana dilimizə, təbiətə, sülhə həsr edilən şeirlər söyləyiblər.Bayram şənliyində həmçinin uşaqların iştirakı ilə hazırlanmış "O Olmasin Bu Olsun” filminin motivləri əsasında səhnəcik, "Nəlbəki”, "Yaylıqlar” və s. kimi rəqslər nümayiş etdirilib. "Anam mehribanım Azərbaycanım”, "Biz məktəbə hazırıq” və s. kimi mahnıların ifası tədbiri daha da maraqlı edib.
Tədbirdə çıxış edən valideynlər və müəllimlər bağça və uşaqlar ilə bağlı öz ürək sözlərini söyləyiblər.
Bağçanın direktoru Ofelya Mustafayeva çıxış edərək qürur hissi ilə bağçanın qazandığı uğurlardan danışıb. Direktorun çıxışından sonra uşaqlar müəllimlərinə hazırladıqları şeir parçalarını ifa edib və onlara gül dəstələri hədiyyə ediblər.
Abşeron Rayon İcra Hakimiyyəti başçısı Aparatının Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov uşaqları məktəbə getmələri münasibəti ilə təbrik edib, onlara gələcək həyatda müvəffəqiyyətlər və ölkəmiz üçün layiqli övlad olmalarını arzulayıb.
Bayram tədbirində bağçada təhsil aldığı müddətdə təlimdə qazandığı uğurlara və qrupun tədbirlərində göstərdiyi fəallığa görə bir neçə uşaq tərifnamə ilə təltif olunublar.
Tədbirin sonunda balaca fidanlara fotolarından ibarət albom, hədiyyələr təqdim edilb və tort kəsilib.
Tural Kazımlı