Abşeron rayonu, Xırdalan şəhər 26 saylı körpələr evi-uşaq bağçasında “Əlvida bağça, salam məktəb” devizi altında tədbir keçirildi.
Tədbirdə Abşeron Rayon İcra Hakimiyyətinin əməkdaşı Samirə İsmayılzadə, 26 saylı körpələr evi-uşaq bağçasının müdiri Nigar Səfərova və bağçanın kollektivi iştirak etdilər.
Tədbiri açıq elan edən bağçanın müdiri Nigar Səfərova qonaqları salamlayaraq, uşaqların hər birinə uğurlar dilədi.
Tədbirdə çıxış edən Rayon İcra Hakimiyyətinin əməkdaşı Samirə İsmayılzadə uşaqları təbrik edərək onlara gələcək məktəb həyatlarında uğurlar dilədi. Natiq çıxışında qeyd etdi ki, cəmiyyətin gələcək inkişafının əsasını uşaqlar təşkil edir. Daim qayğıya, şəfqətə ehtiyac duyan uşaqların hüquqlarının qorunması, onların layiqli vətəndaş kimi formalaşdırılması hər bir dövlətin başlıca sosial məsuliyyətlərindəndir. Uşaqlara qayğı təkcə dövlətin üzərinə düşən vəzifə deyil. Hər bir şəxs uşaqların hərtərəfli böyüdülməsi üçün səy göstərməlidir. Çünki uşaqlar təkcə bir evin deyil, bütün el-obanın ən qiymətli, ən dəyərli sərvəti, hər bir xalqın gələcəyidir. Gələcəyimiz olan uşaqları qorumaq isə hamımızın borcudur.
Daha sonra 26 saylı körpələr evi-uşaq bağçasının balaca fidanları “Əlvida bağça, salam məktəb” adlı nağıl ilə maraqlı kompazisiyalar, rəqslər, şeirlər, fokus nümunələri nümayiş etdirdilər.
Tədbirin sonunda balaca fidanlara fotolarından ibarət albom, hədiyyələr təqdim edildi və tort kəsildi.
Tural Kazımlı