Aşağı Güzdək qəsəbəsində ki 29 saylı körpələr evi-uşaq bağçasında “Əlvida bağça, salam məktəb” devizi altında tədbir keçirildi. Bağçanın zövqlə bəzədilmiş həyətində rəngbərəng geyimlərdə olan uşaqlar əvvəlcə dövlət himnimizi oxudular.
Tədbiri giriş sözü ilə açan bağçanın müdirəsi Cimnaz Cəfərova bildirdi ki, bu, bağçanın artıq 1-ci buraxılışıdı. Bu gün yola salınan uşaqlar bağçanın qapısını açanda söz deməyə çəkinsələr də, indi onlar sərbəst danışır, rəqs edir, şeir söyləyir, mahnı oxuyurlar: Hər il uşaqlardan ayrılanda çox kədərlənirəm. Bu gül balaların sabah əllərinə çanta alıb məktəbə gedəcəklərini düşündükdə isə ürəyim fərəhlə dolur”.
Abşeron Rayon İcra Hakimiyyətinin əməkdaşı Seymur Qasımov uşaqları məktəbə getmələri münasibəti ilə təbrik etdi, onlara gələcək həyatda müvəffəqiyyətlər və ölkəmiz üçün layiqli övlad olmalarını arzuladı. S. Qasımov həmçinin rayon rəhbərliyi tərəfindən Abşeron rayonunun kənd və qəsəbələrində təhsil sahəsində aparılan işlər və rayonda həyata keçirilən layihələr barədə ətraflı məlumat verərək bildirdi ki, Abşeronda son illər 50-dən çox bağça və məktəb tikilərək istifadəyə verilib.
Daha sonra tərbiyəçilərin xüsusi köməyi ilə tədbirə hazırlaşan uşaqlar müəllimə, anaya, vətənə aid şeirlər söylədilər, rəqs etdilər, səhnəciklər göstərdilər. Onların çıxışları alqışlarla qarşılandı.
Sonda balaca fidanlara fotolarından ibarət albom, hədiyyələr təqdim edildi və tort kəsildi.
Firuz Dadaşov
