Azərbaycan Silahlı Qüvvələrinin yaradılmasının 100 illik yubileyi münasibətilə Abşeron rayon, Xırdılan şəhər 15 saylı körpələr evi-uşaq bağçasında tədbir keçirilib.
Tədbirdə əvvəlcə ulu öndər Heydər Əliyevin və şəhidlərin ruhu bir dəqiqəlik sükutla yad edilib və dövlət himni səsləndirilib.
Bayram tədbirində uşaqların ifasında hərbi vətənpərvərlik mövzusu işıqlandırılıb, Azərbaycanın işğal altında olan torpaqlarının azad edilməsində canlarından keçən şəhidlərimizə, ordumuzahəsr edilən şeirlər, mahnılar, eləcə də səhnəciklər təqdim edilib. “Kiçik əsgərlərimizin” dövlət bayrağının səhnəyə gətirilməsi alqışlarla qarşılanıb.Uşaqlar biri-birindən maraqlı rəqs nömrələri göstərərək şən mahnılar oxuyublar.
Sonra çıxış edən bağçanın müdirəsi Mətanət Novruzova Azərbaycan Silahlı Qüvvələrinin yaradılması tarixindən danışıb. Qeyd edib ki, 1918-ci il iyunun 26-da Azərbaycan Xalq Cümhuriyyəti Nazirlər Şurasının qərarı ilə ilk müntəzəm hərbi hissə – əlahiddə Azərbaycan korpusu yaradılıb. Həmin il mayın 28-də qəbul edilmiş “İstiqlal bəyannaməsi”ndə qeyd edilirdi ki, Azərbaycan özünü xarici müdaxilələrdən müdafiə etmək, daxili düşmən qüvvələrini zərərsizləşdirmək üçün nizami orduya malik olmalı, özünün silahlı qüvvələrini yaratmalıdır.
Ümummilli lider Heydər Əliyevin 1998-ci il 22 may tarixli Fərmanına əsasən iyunun 26-nın Azərbaycan Respublikası Silahlı Qüvvələri Günü elan olunduğunu qeyd edən M.Novruzova hazırda maddi-texniki təchizat və döyüş qabiliyyəti baxımından Azərbaycan Silahlı Qüvvələrinin Cənubi Qafqazda ən güclü ordu olduğunu vurğulayıb: “Ümummilli lider Heydər Əliyevin siyasətini uğurla davam etdirən Azərbaycan Prezidenti, Silahlı Qüvvələrin Ali Baş Komandanı İlham Əliyevin orduya göstərdiyi diqqət və qayğı nəticəsində Silahlı Qüvvələrimiz son illər qüdrətini artırıb. Bu gün ordu quruculuğu dövlətimizin başçısının diqqət mərkəzindədir. Ordunun döyüş hazırlığı səviyyəsinin artırılması, onun müasir hərbi texnika və vasitələrlə gücləndirilməsi, hərbi qulluqçuların sosial-məişət şəraitinin yaxşılaşdırılması istiqamətində müvafiq tədbirlər həyata keçirilir”.
Bayram tədbirində çıxış edən Abşeron rayon icra hakimiyətinin əməkdaşı Samirə İsmayılzadə əlavə edib ki, Aprel döyüşləri dövlətimizin və ordumuzun qüdrətini bütün dünyaya nümayiş etdirib. Düşmən təxribatlarının qarşısını almaq məqsədilə Silahlı Qüvvələrimizin bölmələrinin keçirdiyi əks-hücum əməliyyatı nəticəsində strateji yüksəkliklər işğaldan azad edilib. Bu döyüşlərdə zabit və əsgərlərimizin göstərdiyi rəşadət xalqımızın yaddaşına həkk olunub.
Tural Kazımlı