21 sentyabr Beynəlxalq Sülh günüdür. BMT bu günü 1981-ci ildə təsis edib. İlk sülh günü 1981-ci ilin sentyabrında qeyd olunub. O vaxtdan Beynəlxalq Sülh günü sentyabr ayının hər 3-cü çərşənbə axşamı qeyd edilirdi. Lakin 2001-ci ildə Birləşmiş Kralıq tərəfindən təklif olunan qətnamə ilə 2002-ci ildə BMT Sülh günü üçün 21 sentyabr tarixini dəqiq tarix kimi müəyyənləşdirib və bu tarixi ümumdünya atəşkəs günü elan edib.
Elə bu münasibətlə Xırdalan şəhər 2 nömrəli tam orta məktəbdə “Qoy həmişə sülh olsun!” adlı tədbir keçirilib. Tədbirdə məktəbin pedaqoji kollektivi və şagirdlər iştirak ediblər.
Dövlət himninin səsləndirilməsi ilə başlanan tədbirdə çıxış edənlər Beynəlxalq Sülh Gününün ölkəmizdə geniş qeyd olunmasının əhəmiyyətindən, Azərbaycan dövlətinin sülhsevər siyasətindən, xalqımızın zorla müharibəyə cəlb edilməsinə baxmayaraq, ölkəmizin tolerant, daim sülh tərəfdarı olmasından danışıblar. Qeyd edilib ki bu gün, həmçinin məktəbdə sülh dərsləri, müxtəlif müsabiqələr keçirilib.
Daha sonra tədbir şagirdlərin hazırladıqları bədii kompozisiya ilə davam edib. Onlar sülh, vətən və azadlıq mövzularında şeirlər səsləndirib, mahnılar oxuyublar.
Şamo Əliyev
