Abşeron rayonunda 18 oktyabr - Dövlət müstəqilliyi gününə həsr edilmiş silsilə tədbirlər davam edir. Həmin tədbirlər çərçivəsində Abşeron rayonu 17 saylı körpələr evi- uşaq bağçasında Dövlət müstəqilliyi gününə həsr olunmuş bayram tədbiri keçirildi. Öncə Azərbaycan Respublikasının Dövlət himni səsləndirildi.
Bayram şənliyini giriş sözü ilə açan bağanın müdiri Könül İbrahimova Azərbaycan xalqının milli müstəqillik uğrunda çoxəsrlik mübarizəsindən bəhs etdi. Qeyd olundu ki, 1991-ci il oktyabrın 18-də Azərbaycanın keçmiş Ali Sovetinin sessiyasında mühüm tarixi sənəd - Dövlət Müstəqilliyi haqqında Konstitusiya Aktı qəbul edilməklə Azərbaycanın dövlət müstəqilliyi uzun illərdən sonra yenidən bərpa edildi. 1993-cü ildə ölkədə siyasi çəkişmələr, vətəndaş qarşıdurması, milli iğtişaşlar gücləndiyi bir dövrdə yenidən siyasi hakimiyyətə gələn ümummilli lider Heydər Əliyev siyasi sabitlik və həmrəyliyi bərqərar etməklə Azərbaycanı dövlət müstəqilliyini itirmək təhlükəsindən xilas etdi. Sözügedən məktəbəqədər təhsil müəsissəsinin müdiri vurğuladı ki, Azərbaycan xalqı Azərbaycan Respublikası Prezidenti İlham Əliyevi yenidən Prezident seçməklə bir daha Heydər Əliyev ideyalarına sədaqət və milli birlik nümayiş etdirdi, müstəqil Azərbaycanın firavan gələcəyinə səs vermiş oldu.
Tədbir iştirakçıları bağçanın fidanları tərəfindən hazırlanmış vətənpərvərlik mövzusunda ifa olunan şer və mahnıları dinləyib, rəqslərə tamaşa ediblər.
Şamo Əliyev