Abşeronda “Fövqəladə hallar uşaqların gözü ilə” uşaq – yaradıcılıq müsabiqəsi keçirilib

FHN Sumqayıt Regional Mərkəzinin və rayon Təhsil Şöbəsinin birgə təşkilatçılığı ilə 30.10.2018-ci il tarixində Abşeron rayonunun Uşaq Gənclər İnkişaf Mərkəzində rayon məktəblilərinin Ümummilli lider Heydər Əliyevin 95 illik yubileyinə həsr olunmuş “Fövqəladə hallar uşaqların gözü ilə” uşaq yaradıcılıq müsabiqəsinə hazırladığı işlərə baxış keçirilib.

Tədbirdə FHN Sumqayıt Regional Mərkəzin Maarifləndirmə şöbəsinin müdir əvəzi Emin Ramazanov, Abşeron rayon Təhsil Şöbəsinin müdiri Nazilə Məmmədova , Uşaq Gənclər İnkişaf Mərkəzinin direktoru Aytən Rüstəmova və orta məktəblərin müəllimləri, münsiflər heyyəti iştirak edib. Münsiflər heyyətinin iştirakı ilə müsabiqəyə təqdim olunmuş 300-ə yaxın işlərin içərisindən ən yaxşıları seçilərək “Fövqəladə hallar uşaqların gözü ilə” uşaq yaradıcılıq müsabiqəsinə göndərilib.

Tədbirin keçirilməsində məqsəd Fövqəladə Hallar və Təhsil nazirlikləri tərəfindən istedadlı uşaqların üzə çıxarılması, onlara dəstək göstərilməsi, uşaqlara təhlükəsiz həyat fəaliyyətinin öyrədilməsi, yetişməkdə olan gənc nəslin vətənpərvərlik ruhunda tərbiyə edilməsi, uşaqlar və gənclər arasında fövqəladə hal problemlərinə ictimaiyyətin diqqətini yönəltməkdir.
Müsabiqədə rayonun 38 məktəbinin istedadlı şagirdləri rəsmlər, plakatlar, əl işləri, şeirlər, yanğın qəza-xilasetmə texnikasının modelləri və yumşaq oyuncaqlar təqdim ediblər.