Abşeron rayon, Xırdalan şəhər 23 saylı körpələr evi-uşaq bağçasının məktəbəhazırlıq qrupunda Ətraf aləmlə tanışlıqdan açıq məşğələ keçirilib. Abşeron RİH-in əməkdaşı Samirə İsmayılzadənin, rayon ərazisində yerləşən məktəbəqədər təhsil müəssisələrinin müdirləri və tərbiyəçilərinin iştirak etdikləri məşğələdə, bağçanın tərbiyəçisi Xumar Hüseyinova “Suyun əlamətləri və halları ” haqqında körpə fidanlara şifahi olaraq məlumat verib.
Bağçanın zövqlə bəzədilmiş musiqi otağında düzənlənən məşğələdə, mövzunun öyrənilməsi üçün motivasiya qurulub, həmçinin yeni təlim üsullarından və əyani vasitələrdən istifadə edilib.
Balaca təbiətsevərlər suyun tərkibini izah edən bir sıra sınaqların keçirilməsində iştirak ediblər.
Təlim zamanı uşaqlara suyun xüsusiyyətləri, onun Yer kürəsi, insan orqanizmi və ümumiyyətlə canlı aləm üçün əhəmiyyətindən bəhs edilib. “Uşaqlar üçün laboratoriya”da azyaşlılar suyun əlamətləri və halları, suyun qorunması və ona qənaət edilməsi, eləcə də, su hövzələrinin təmiz saxlanması yolları ilə tanış olublar.
Məşğələdə həmçinin bağçanın balaca sakinləri tərəfindən suya aid şeirlər və tapmacalar səsləndirilib, müxtəlif gimnastik nömrələr nümayiş etdirilib.
Məşğələdən sonra onun təhlili aparılıb. Bağçanın müdirəsi Aybəniz Sadıxova, Abşeron RİH-in əməkdaşı Samirə İsmayılzadə, 1 saylı körpələr evi-uşaq bağçasının müdiri Vüsalə Məşədiyeva, 27 saylı körpələr evi-uşaq bağçasının müdiri Samirə Məmmədova və başqaları çıxış edərək bildiriblər ki, bağçada uşaqlara canlı və cansız aləmlə tanışlıq, təbiətin qanunauyğunluqlarını başa salmaqla yanaşı, onlarda vətənpərvərlik, canıyananlıq, mehribanlıq, tapşırıqlara əməl etmək, təmizkarlıq, qətiyyətlilik, doğruçuluq, dostluq, yoldaşlıq kimi mənəvi-əxlaqi keyfiyyətlərin formalaşdırılması istiqamətində ardıcıl iş aparılır.
