Xırdalan şəhər 24 nömrəli körpələr evi-uşaq bağçasının 5 illik yubileyinə həsr olunan tədbir keçirilib.Tədbirdə Abşeron rayon İcra Hakimiyyəti başçısının müavini Fuad Cəbrayılov, rayon ərazisində yerləşən məktəbəqədər təhsil müəssisələrinin rəhbərləri, tərbiyəçilər və KIV nümayəndələri iştirak edib.
Məktəbəqədər təhsil müəssisəsinin 5 illik yubileyi münasibətilə bağça kollektivini və iştirakçıları təbrik edən Fuad Cəbrayılov bildirib ki, dövlətimizin başçısının rəhbərliyi altında ölkəmizdə bütün sahələrdə olduğu kimi təhsilə göstərilən diqqət və qayğı, təhsilin daha da inkişafı, təkmilləşdirilməsi istiqamətində həyata keçirilən ardıcıl və sistemli tədbirlər, icra edilən genişmiqyaslı layihələr, eləcə də təhsilin təməlini təşkil edən məktəbəqədər təhsilin yüksək standartlara uyğun inkişafı, maddi-texniki bazasının gücləndirilməsi istiqamətində mühüm addımların atılır. O, günü-gündən inkişaf edən dövlətimizin gələcəyi olan uşaqların təlim-tərbiyəsinin yüksək səviyyədə təşkili, onların sağlamlığının qorunması və istedadlı kadr potensialının formalaşmasına xidmət edərək daim diqqət mərkəzində olduğunu vurğulayıb. F.Cəbrayılov son illərdə Abşeron Rayon İcra Hakimiyyətinin başçısı İradə Gülməmmədovanın tapşırıq və tövsiyələri əsasında rayonda bir çox uşaq bağçalarında əsaslı təmir və yenidənqurma işlərinin aparıldığını, yeni uşaq bağçalarının tikilməsi ilə bağlı xeyli işlərin görüldüyünü və bununla da məktəbəqədər təhsilin inkişafına nail olmaq istiqamətində bir sıra uğurların əldə edildiyini diqqətə çatdırıb.
Bağçanın müdiri Leyla Bayramova vurğulayıb ki, son illər Abşeron rayonunda onlarla bağçanın, uşaq evlərinin tikilməsi bir çoxunun isə yenidən bərpası Abşeronda uşaqlara göstərilən diqqət və qayğının mühüm tərkib hissəsi olmaqla yanaşı həm də Azərbaycan gələcəyinin daha etibarlı təminatına geniş imkanlar açır. Fəaliyyətlərinin hər anında rayon icra hakimiyyətinin başçısı İradə Gülməmmədovanın diqqət və qayğısını gördüklərini önə çəkən bağça müdiri həmçinin bağçanın təcrübəli pedaqoji kollektivinin olduğunu, tərbiyəçilərin səylə çalışdığını, körpə fidanların təhsilində, dünyagörüşünün formalaşmasında əvəzsiz xidmətlər göstərdiyini qeyd edib.
Daha sonra məktəbə qədər təhsil müəssisəsinin fidanlarının hazırladığı əyləncəli bayram proqramı nümayiş etdirilib.
Sonda kollektivlə birgə xatirə şəkli çəkilib.