2 saylı orta məktəbdə Xocalı soyqırımının qurbanları anılıb
Tarix:27-02-2019, 00:14
Fevralın 26-da Abşeron rayonu Xırdalan şəhər 2 saylı tam orta məktəbdə Xocalı soyqırımının 27-ci ildönümünə həsr olunan “Xocalı - qan yaddaşımız” adlı tədbir keçirilib. Əvvəlcə şəhidlərin xatirəsi bir dəqiqəlik sükutla yad edilib.
Tədbirdə şagirdlər Bahar Lətifqızının “Xocalı” kompozisiyasını pontamim şəkildə ifa ediblər. Həmçinin Gülxani Pənahın “Bura vətəndir” adlı kitabından “Xocalı ay Xocalı”, Mirvari Dilbazinin “Xocalı fəryadı” pyeslərindən səhnələri canlandırıblar. Məktəblilərin tədbirində bir sıra şair və yazıçıların əsərlərindən istifadə edilib, “Qarabağ şikəstəsi”, “Xocalı” əsəri, “Amin”, “Bayatı Şiraz” mahnıları səsləndirilib. Xocalı soyqırımına aid görüntülərdən ibarət videoçarx tamaşaçılara təqdim olunub.
Tədbir iştirakçıları “Xocalı şəhidlərinə həsr olunmuş mahnı”nı oxuyub, bayatılar və şeirlər söyləyiblər.
Sonda çıxış edənlər Ermənistanın Azərbaycana qarşı həyata keçirdiyi işğalçılıq siyasətindən danışıb, Xocalı faciəsinin bu siyasətin davamı olduğunu diqqətə çatdırıblar. Bildirilib ki, bütün çətinliklərə, maneələrə baxmayaraq, Azərbaycan dövləti Prezident İlham Əliyevin rəhbərliyi ilə Xocalı soyqırımının dünyada tanıdılması, Ermənistan-Azərbaycan Dağlıq Qarabağ münaqişəsi barədə həqiqətlərin beynəlxalq ictimaiyyətə çatdırılması, işğal edilmiş torpaqlarımızın azad olunması üçün bütün zəruri addımları atır və atacaq.