Belə bir aksiya Xırdalan şəhər 2 nömrəli tam orta məktəbdə reallaşdı. Ekologiya və Təbi Sərvətlər Nazirliyi Təhsil Nazirliyi ilə birlikdə plastik tullantılarla mübarizəyə həsr olunan tədbir təşkil edib.
4 saylı Regional Ekologiya və Təbii sərvətlər idarəsi əməkdaşlarının iştirakı ilə keçirilən tədbirdə əvvəlcə Xırdalan şəhər 2 nömrəli tam orta məktəbin direktoru Ədalət Camalova çıxış edərək bu cür aksiyaların təhsil müəssisələrində keçirilməsinin vacibliyinə toxundu. Bildirdi ki, əsas məqsəd ətraf mühitə tullantıların atılmasının qarşısını almaq, həmçinin ərazilərin plastik və digər tullantılarla çirklənmədən qorumaq və bu işə ictimaiyyəti cəlb etməklə töhfə verməyə çağırmaqdır. Ədalət Camalova vurğuladı ki, mütəxəssislərin təbirincə desək , plastik qabların torpağın altında çürüməsi 100 ildən də artıq vaxt aparır. Bu səbəbdən ətraf mühitin plastik tullantılarla çirkləndirilməsi dünyanı narahat edən əsas məsələlərdəndir.
Tədbirdə 4 saylı Regional Ekologiya və Təbii sərvətlər idarəsinin əməkdaşları, Elmar Musayev, Vüsal İbrahimli, Turanə Qarayeva və digərləri çıxış edərək, bu cür tədbirlərin keçirilməsini ətraf mühitin qorunmasına diqqət artırılması baxımından yüksək qiymətləndirdilər.
Daha sonra şagirdlər ətraf ərazidən topladıqları plastik tullantıları xüsusi qablara doldurdular.
Qeyd edək ki, hazırda dünyanın 40 ölkəsi polietilen məhsulların istehsalını və satışını qadağan edib və ya məhdudlaşdırıb. Azərbaycan da plastik məmulatlardan istifadəni azlatmaq üçün hərəkətə keçib.
