Abşeron rayonu, Xırdalan şəhər 26 saylı körpələr evi-uşaq bağçasında “Əlvida bağça, salam məktəb” devizi altında tədbir keçirilib.
Bayram şənliyində balaca fidanlar Azərbaycan və Rus dillərində vətənə, müəllimə, ana dilimizə, təbiətə, sülhə həsr edilən şeirlər söyləyiblər. Tədbirdə həmçinin uşaqların iştirakı ilə hazırlanmış xarici rəqslər nümayiş etdirilib. "Anam mehribanım Azərbaycanım”, "Biz məktəbə hazırıq” və s. kimi mahnıların ifası tədbiri daha da maraqlı edib.
Uşaqları məktəbə getmələri münasibəti ilə təbrik edən Abşeron rayon İcra Hakimiyyətinin əməkdaşı Seymur Qasımov, onlara gələcək həyatda müvəffəqiyyətlər və ölkəmiz üçün layiqli övlad olmalarını arzulayıb. S.Qasımov rayon rəhbəri İradə Gülməmmədovanın məktəbəqədər təhsilə göstərdiyi qayğı nəticəsində əldə edilən nailiyyətlərdən, körpə fidanların hərtərəfli inkişafı ilə əlaqədar həyata keçirilən uğurlu layihələrdən bəhs, bağçanın pedaqoji kollektivinə uğurlar arzulayıb
Məktəbəhazırlıq qrupunun uşaqlarını, onların valideynlərini və tərbiyəçilərini məzun günü münasibətilə təbrik edən bağçanın müdirəsi Nigar Səfərova, bağçada uşaqlar üçün yaradılan şəraitə görə rayon rəhbəri İradə Gülməmmədovaya minnətdarlığını ifadə edib. N.Səfərova qürur hissi ilə bağçanın qazandığı uğurlardan da danışıb.Bağçanın fəaliyyətində müəllim kollektivinin əməyinin xüsusi olduğunu vurğulayıb.
Çıxışlardan sonra balaca fidanlara fotolarından ibarət albom, hədiyyələr təqdim edilib və tort kəsilib.
Sonda bağçanın həyətində körpə fidanların hazırladığı rəqs və fləşmob nümayiş olunub.
Tural Kazımlı
