Abşeron rayon, Xırdalan şəhər 17 saylı körpələr evi-uşaq bağçasının müdiri İbrahimova Könül Əkbər qızı Azərbaycan Prezidenti Cənab İlham Əliyevin 27 may 2019-cu il tarixli Sərəncamı ilə “Azərbaycan Xalq Cümhuriyyətinin 100 illiyi (1918-2018)” yubiley medalı ilə təltif edilib.
Abşeron Rayon İcra Hakimiyyətinin başçısı İradə Gülməmmədova yubiley medalını rayonun fəal gənclərinin də iştirak etdiyi tədbirdə K.İbrahimova təqdim edib.
“Azərbaycan Xalq Cümhuriyyətinin adını daşıyan medala layiq görülməyim təkcə mənə yox, eyni zamanda rayon təhsilinə göstərilən yüksək dəyər və qiymətin bariz nümunəsidir. Bu medal mənim əməyimə verilən ən yüksək qiymətdir. Onu deyə bilərəm ki, xalqımızın gələcəyi olan körpə fidanların təlim-tərbiyəsinin keşiyində ayıq-sayıq dayanacağam. Gənc, müstəqil Azərbaycanın gələcək qurucularının hərtərəfli şəxsiyyətlər kimi yetişməsi, milli-mənəvi dəyərlərimizə hörmət hissi ilə böyüməsi və onların vətənpərvərlik ruhunda tərbiyə olunmaları üçün əlimdən gələni əsirgəməyəcəyəm. “Azərbaycan Xalq Cümhuriyyətinin 100 illiyi (1918-2018)” medalına layiq görülmək böyük şərəfdir. Buna görə cənab Prezidentimiz İlham Əliyevə öz adımdan və kollektivimiz adından səmimi minnətdarlığımı bildirir, bu yüksək təltifə layiq görülən bütün həmkarlarımı təbrik edirəm ”.
