FHN Sumqayıt Regional Mərkəzi ilə Abşeron rayon Təhsil Şöbəsi arasında razılaşdırılmış Tədbirlər Planına uyğun olaraq 1Mart Ümumdünya Mülki Müdafiə Gününə həsr olunmuş “Həyatının təhlükəsizliyi sənin öz əlindədir” mövzusunda 27 fevral 2015-ci il tarixində Abşeron rayon Xırdalan şəhər 10№-li tam orta məktəbdə FHN Sumqayıt Regional Mərkəzin, məktəbin müəllim və şagird heyyətinin iştirakı ilə maarifləndirici tədbir keçirildi.
Məktəbin direktoru Elnarə Həsənova tədbiri açıq elan edərək tədbir iştirakçılarını salamladı. O, FHN Sumqayıt Regional Mərkəzin təhsil müəssisələrində maarifləndirmə məqsədilə mütəmadi olaraq keçirdiyi bu cür tədbirləri yüksək qiymətləndirdiyini vurğuladı. Ümumdünya Müki Müdafiə Günü ilə əlaqədar FHN-nin bütün əməkdaşlarını təbrik edən məktəbin direktoru rəhbərlik etdiyi təhsil ocağında daim mülki müdafiə məsələlərinə önəm verildiyini və bu sahədə şagirdlərlə mütəmadi olaraq işlərin aparıldığını diqqətə çatdırdı.
Tədbirin təşkili və keçirilməsi mahiyyəti haqqında çıxış edən Sumqayıt Regional Mərkəzin baş məsləhətçisi Ceyhun Şabanov ilk növbədə tədbir iştirakçılarına Fövqəladə Hallar Nazirliyinin yaranma tarixi və fəaliyyəti barəsində məlumat verdi. Sonra o, “Fövqəladə hallar zamanı davranış qaydaları” və “112 qaynar telefon xətti təhlükəsizliyimizin qarantıdır” mövzusunda çıxış edərək tədbir iştirakçılarına təbii və texnogen xarakterli fövqəladə hallar, onların baş verdiyi zaman düzgün davranış qaydaları, eləcə də 112 qaynar telefon xəttinin fəaliyyəti və ona hansı hallarda zəng etmələri haqqında məlumat verdi.
“Elektriklə rəftar qaydaları”, “Dəm qazı təhlükəsi”, “Novruz bayramı ilə bağlı yanğın təhlükəsizliyi”, “Zərərçəkmiş insanlara ilkin tibbi yardımın göstərilməsi” kimi mövzularda çıxışlar edən Sumqayıt Regional Mərkəzin digər əməkdaşları eyni zamanda qeyd etdilər ki, Beynəlxalq Müki Müdafiə Təşkilatı Baş Məclisinin qərarı ilə 1972-ci ildən etibarən hər il 1 mart tarixində bu təşkilata üzv olan bütün ölkələrdə “Ümumdünya Müki Müdafiə günü” kimi qeyd edilir. Bu beynəlxalq qurum fövqəladə hallar baş verdikdə əhatə etdiyi ölkələrə yardım göstərir, həmin ölkələrdə mühafizə xidmətini inkişaf etdirir və əlaqələndirir. Azərbaycan Respublikası bu təşkilatın üzvlüyünə qəbul edildiyi üçün hər il onun keçirdiyi bütün tədbirlərdə fəal iştirak edir. Qeyd edildi ki, Beynəlxalq Mülki Müdafiə gününün keçirilməsində məqsəd ictimaiyyətin diqqətini bu təşkilatın gördüyü işin vacibliyinə cəlb etmək, eləcə də fəlakətlərin qarşısının alınması və nəticələrinin aradan qaldırılması üçün məsuliyyət daşıyan əməkdaşların işini lazımınca qiymətləndirməkdir. Respublikamızda bu sahənin inkişafı ilə bağlı dövlət tərəfindən əsaslı işlər görüldüyü kimi, Abşeron rayonunda da təbii fəlakətlərin və fəvqəladə hadisələrin qarşısını almaq və ya bu kimi hallarda xilasetmə işinin təşkili haqqında maarifləndirmə tədbirləri görülür.
Belə bir tədbirin keçirilməsinə dəstək verdiklərinə görə Sumqayıt Regional Mərkəzinin bütün əməkdaşlarına minnətdarlıqlarını bildirən şagirdlər tədbirin sonunda şeir söyləyib, ədəbi-bədii kompozisiya
nümayiş etdirdilər.
