Abşeron rayonunun Görədil kənd məktəbinin akt zalında kənd icra nümayəndəliyinin 2015-ci ilin yekunları və 2016-cu ildə qarşıda duran vəzifələrə həsr olunmuş hesabat yığıncağı keçirilmişdir.
Yığıncaqda Abşeron Rayon icra hakimiyyəti başcısının müavini İlham Quliyev , Ərazi idarəetmə və yerli özünüidarəetmə orqanları ilə iş şöbəsinin müdüri Azər Məmmədov , Rayon icra hakimiyyətinin məsul işçiləri, idarə, müəssisə və təşkilat rəhbərləri, habelə kənd sakinləri iştirak etmişlər.
Görədil kənd icra nümayəndəsi Rəhman Səfərovun 2015 -ci ilin yekunları ilə bağlı hesabat məruzəsində görülmüş işlər geniş təhlil edilmiş, qarşıda duran vəzifələrə, problemlərə toxunulmuşdur. 2015-ci ilin ölkəmiz üçün çox uğurlu keçdiyini bildirən məruzəçi, respublikada ardıcıl həyata keçirilən iqtisadi islahatların Abşeron rayonunun sosial-iqtisadi inkişafına da müsbət təsir göstərdiyini, rayonda yeni xidmət sahələrinin, istehsal müəssisələrinin yaranmasına, iş yerlərinin açılmasına, əhalinin həyat səviyyəsinin yüksəlməsinə səbəb olduğunu xüsusi vurğulamışdır.Məruzəçi qeyd etmişdir ki, 2015 -ci ildə rayonun daxili imkanları hesabına Görədil kəndində uşaq bağçasının tikintisinə başlanmışdır.
Yığıncaqda çıxış edən kənd sakinləri rayon icra hakimiyyəti başçısı tərəfindən əhalinin sosial rifahının yaxşılaşdırılması istiqamətində həyata keçirilən tədbirləri ürəkdən bəyəndiklərini bildirmiş, eyni zamanda qarşılaşdıqları problemlərə toxunmuşlar. Qeyd olunmuşdur ki, məhəllə daxili yolların əsaslı təmir olunması ,bağça tikintisinin ləng aparılması və digər problemlər sakinləri narahat edən ən vacib məsələlərdir.
Rayon İcra hakimiyyəti başçısının müavini İlham Quliyev sakinlərin qaldırdıqları məsələlərin həlli ilə bağlı əlaqədar müəssisə və təşkilatların rəhbərlərinə konkret tapşırıqlar vermişdir.
Rayonun digər qəsəbə və kəndlərində də 2015-ci ilin yekunları ilə bağlı hesabat yığıncaqlarının keçirilməsinə start verilmişdir.