Abşeron rayon Heydər Əliyev Mərkəzində “Müəllim-şagird münasibətləri və sinfin idarəedilməsi” mövzusunda seminar keçirilib. Rayon İcra Hakimiyyətinin və Təhsil Nazirliyinin təşkilatçılığı ilə keçirilən tədbirdə icra başçısının müavini Fuad Cəbrayılov, Təhsil Nazirliyinin mətbuat xidmətinin rəhbəri Cəsarət Valehov, Abşeron rayon təhsil şöbəsinin müdiri Kamran Rzayev, rayon məktəblərinin drektor və müavinləri, pedaqoji şuranın üzvləri, KİV nümayəndələri iştirak ediblər.
Seminarın məqsədi müəllim-şagird münasibətlərinin yaxşılaşdırılmasına dəstək göstərmək və təhsilin keyfiyyətinin yüksəldilməsində sağlam münasibətlərin rolunu vurğulamaq olub.
Son zamanlar mətbuatda müəllim-şagird münasibətlərində baş verən hadisələrlə bağlı məqalələrin dərc edildiyini vurğulayan K.Rzayev bunun cəmiyyətdə rezanans yaratdığını qeyd edib. O bildirib ki, Təhsil Nazirliyi tərəfindən ölkənin bütün rayonlarında müəllim heyətinin iştirakı ilə seminarların təşkil olunmasına qərar verilib. Bu seminarlara ilk olaraq Abşeron rayonundan start verildiyini deyən K.Rzayev bu tipli tədbirlərin müəllim-şagird münasibətlərinin qurulmasındakı rolunun əhəmiyyətindən danışıb.
Bundan sonra Təhsil Nazirliyinin baş məsləhətçisi Vəfa Yaqublu şagirdlərdə müsbət davranış münasibətlərinin formalaşdırılması, ümumi təhssil müəssisələrində sağlam mühitin yaradılması, müəllimlərin peşə standartları və etik davranış qaydaları haqqında təqdimatla çıxış edib.
Müəllim-şagird münasibətlərində neqativ təzahürlərin yaranma səbəbləri, müəllimlərin şagirdlərlə ünsiyyət qurmaq və əməkdaşlıq etmək bacarığının əsas müddəaları izah olunub, mövcud problemlərin konstruktiv həlli yolları müzakirə edilib. Seminarda həmçinin, böhran vəziyyətlərində kommunikasiya işinin təşkili və müvafiq fəaliyyətin nizamlanması məsələlərindən söhbət açılıb.
Tədbirin sonunda mövzu ilə əlaqədar olaraq aktiv müzakirələr aparılıb. Çıxış edənlər müəllim-şagird münasibətlərinin tənzimlənməsində valideyn faktorunun böyük rol oynadığını, müəllimin nüfuzunun qorunması üçün valideyn-müəllim-şagird ünsiyyətinin sağlam prinsiplər əsasında qurulmasının önəmini vurğulayıblar.
