Abşeronda ümummilli lider Heydər Əliyevin 93 illiyinə həsr olunmuş sərbəst güləş üzrə yeniyetmələr arasında açıq rayon birinciliyi keçirilib. Yeni Azərbaycan Partiyası Abşeron Rayon Təşkilatının və rayon gənclər və idman idarəsinin birgə təşkilatçılığı ilə düzənlənən idman yarışında Abşeron rayon Uşaq-Gənclər İdman Məktəbinin 110 idmançısı 10 çəki dərəcəsi üzrə qalib adı uğrunda mübarizə aparıblar.
Yarışın açılışında çıxış edən Yeni Azərbaycan Partiyası Abşeron Rayon Təşkilatının sədri Bilman Vəliyev ümummilli lider Heydər Əliyevin həyat və fəaliyyəti, onun Azərbaycanın müstəqilliyinin möhkəmləndirilməsində, demokratik, hüquqi, dünyəvi dövlət quruculuğunda, ölkəmizdə sabitliyin bərqərar olunmasında əvəzsiz xidmətlərindən bəhs edib. O, son illərdə Azərbaycan idmançılarının dünyada qazandıqları uğurlardan danışaraq, bu nailiyyətlərin arxasında Ümummilli Liderimiz tərəfindən müəyyən edilmiş uzaqgörən gənclər və idman siyasətinin dayandığını vurğulayıb.
Daha sonra çıxış edən Abşeron rayon Gənclər və İdman İdarəsinin rəisi Əsgər Əmirəliyev Abşeron güləş məktəbinin yetirmələrinin ölkədaxili və beynəlxaq yarışlarda qazandığı uğurlardan danışıb. O, qeyd edib ki, bu gün Azərbaycan dünya ölkələri sırasında təkcə öz iqtisadi uğurları ilə deyil, həm də idman sahəsində göstəriyi nailiyyətlərlə tanınmaqdadır. Azərbaycan Respublikasının Prezidenti İlham Əliyevin ölkəmizdə idman və bədən tərbiyəsinin inkişafına böyük diqqət və qayğı göstərdiyini deyən Ə.Əmirəliyev paytaxt və regionlarda müxtəlif idman qurğularının, Olimpiya komplekslərinin tikilib istifadəyə verildiyini, gənclərin idmana cəlb edilməsi üçün məqsədyönlü işlərin aparıldığını vurğulayıb.
Bundan sonra idmançılar öz güclərini sınayıblar. Sonda qaliblərə rayon gənclər və idman idarəsinin diplomları, medallar və qiymətli hədiyyələr təqdim edilib.
