Bu gün Xırdalan şəhərində Abşeron Rayon İcra Hakimiyyətinin və Gənclər və İdman Nazirliyinin birgə təşkilatçılığı ilə “Ümummilli Lider Heydər Əliyevin azərbaycançılıq məfkurəsinin gənclərin vətənpərvərlik tərbiyəsində rolu” mövzusunda konfrans keçirilib. Heydər Əliyev Mərkəzində düzənlənən tədbirdə rayon İcra Hakimiyyətinin başçısı İradə Gülməmmədova, gənclər və idman nazirinin müavini İntiqam Babayev, rayon ictimaiyyəti və KİV nümayəndələri iştirak edib. İştirakçılar əvvəlcə Ulu Öndər Heydər Əliyevin abidəsini ziyarət edərək önünə tər çüçəklər düzüb, əziz xatirəsini yad ediblər. Bundan sonra mərkəzdə yaradılan şəraitlə əlaqədar tanışlıq gəzintisi olub.
Konfransda çıxış edən İradə Gülməmmədova bu gün gənclərimizin dövlət idarəçiliyinin bütün strukturunda çalışdığını bildirib. Gənc nəslin ölkənin ictimai-siyasi həyatında mühüm rol oynadığını vurğulayan başçı azərbaycançılıq ideyası və onun gənclər üzərinə qoyduğu məsuliyyətdən danışıb: “Ümummilli lider Heydər Əliyev demişdir: “Gənclər bizim gələcəyimizdir”. Gələcəyimizin etibarlı əllərdə olması üçün azərbaycançılıq idealogiyası bizim üçün əsas istinaq nöqtəsi olmalıdır”.
Azərbaycanın uzun müddət Sovet İttifaqının tərkibində olduğunu, 25 ildir ki müstəqil dövlət olaraq inkişaf etdiyini vurğulayan İ.Gülməmmədova bu müddət ərzində dünya dövlətləri tərəfindən etiraf edilən iqtisadi sıçrayışın əldə edildiyini söyləyib.
Abşeronda həyata keçirilən layihələrdən söz açan başçı son 10 ildə rayon ərazisində 50-dən çox bağça və məktəbin tikilərək istifadəyə verildiyini, hazırda isə 5 bağçanın inşa edildiyini və yaxın günlərdə istismara götürüləcəyini vurğulayıb: “Gənclərə istiqamətlənmiş dövlət siyasəti, ölkənin hər yerində olduğu kimi, Abşeron rayonunda da uğurla həyata keçirilməkdədir. Abşeronlu gənclər istər elm, bilik, istərsə də idman sahəsində ölkəmizi layiqincə təmsil edib bayrağımızı zirvələrdə dalğalandırırlar. Belə ki, cari ilin 9 ayı ərzində Abşeronlu idmançılar tərəfindən ümumilikdə 103 medal qazanılıb. Bunlardan 72-si respublika, 31-i isə beynəlxalq səviyyəli tədbirlərdə əldə olunub. Ölkəmizdən kənarda qazanılan medalların 14-ü qızıl, 8-i gümüş, 9-u isə bürüncdür. Sözsüz ki, bu qələbələr də gənclərə vətənpərvərlik hisslərinin aşılanmasında xüsusi rola malikdir”
Sonra gənclər və idman nazirinin müavini İ.Babayev çıxış edərək qeyd edib ki, hər bir müstəqil ölkənin müəyyən zərurətləri olur. Bu zərurətlərdən birinin də gənc nəslin tərbiyə edilməsi olduğunu qeyd edən nazir müavini qeyd edib ki, gələcəyin təminatı sağlam gənclik yetişdirməkdən asılıdır. O, deyib ki, Heydər Əliyevin azərbaycançılıq ideologiyasının fəlsəfəsində hər bir insan bərabərdir. Azərbaycançılıq ideyasının milli birlik yaratdığını söyləyən İ.Babayev dünyada baş verən siyasi proseslərdən də danışıb.
Daha sonra Gənclər və İdman Nazirliyi yanında İctimai Şuranın sədri Nurəddin Mehdiyev, Abşeron rayonu Təhsil Şöbəsində tarix fənni üzrə metodist Zərifə Cəbiyeva, Mehdiabad qəsəbə 3 saylı tam orta məktəbin müəllimi İlqar Rəhimov, Saray qəsəbə 3 saylı tam orta məktəbin müəllimi Təranə İsmayılova, Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin baş məsləhətçisi İsmayıl Cəfərov, Mehdiabad qəsəbə 3 saylı tam orta məktəbin müəllimi Aynurə Səfərova, Saray qəsəbə 3 saylı tam orta məktəbin müəllimi Emin Xəlilov çıxış edərək ümummilli lider Heydər Əliyevin azərbaycançılıq idealogiyası və ondan irəli gələn addımlar barəsində danışaraq öz fikirlərini Abşeronlu gənclərlə bölüşüblər.