İstehlakçıların hüquqlarının müdafiəsi ilə əlaqədar maarifləndirmə və təbliğat-təşviqat işlərinin gücləndirilməsi müstəsna əhəmiyyətə malikdir.
Bununla əlaqədar olaraq İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti 17 fevral 2017-ci il tarixindəAbşeron rayonunda aidiyyəti dövlət orqanlarının, ictimai təşkilatların, istehlakçıların və kütləvi informasiya vasitələri nümayəndələrinin iştirakı ilə “Hər bir istehlakçı öz hüquqlarını bilməli və tələb etməlidir” mövzusunda konfrans keçirilib.
Konfransı giriş sözü ilə Abşeron Rayon İcra Hakimiyyəti başçısının müavini İlham Quliyev açıb və “İstehlakçıların hüquqlarının qorunmasında yerli icra hakimiyyəti orqanlarının vəzifələri”ndən danışıb.Sonra İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəis müavini Araz Əliyev çıxış edib.
Müzakirələrdə Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin şöbə müdiri Kamran Umudov “İstehlakçıların hüquqlarının müdafiəsi ilə bağlı görülən işlər və qarşıda duran vəzifələr”, “Ərzaq məhsulları alarkən nələrə diqqət yetirməli” və “Hər bir istehlakçı öz hüququnu bilməlidir” mövzusunda çıxış edib.
Tədbirin ikinci hissəsində “Dövlət satınalmaları sahəsində şəffaflıq, ədalət və səmərəlilik” mövzusunda təlim kursu keçirilib. Burada satınalan təşkilatların nümayəndələri, aidiyyəti dövlət qurumlarının mühasibləri və sahibkarlar iştirak ediblər.
Təlim kursunda Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəis müavini Araz Əliyevin “Satınalma prosesi rəqabət, ədalət və səmərəlilik”, həmin xidmətin şöbə müdirinin müavini Mirdaməd Kərimovun “Dövlət satınalmaları sahəsində mövcud qanunvericilik və onun tətbiqi prosedurları” mövzusunda məruzələri dinlənilib.
Tədbirdə iştirakçıları maraqlandıran çoxsaylı suallara aydınlıq gətirilib, qaldırılan problemlər və verilən təkliflər ətraflı müzakirə olunub.
Şamo Əliyev
