Təbiətin keşiyində durmaq, onu qorumaq hər kəsin müqəddəs borcudur. Bu gün Abşeron rayonunda ətraf mühitin mühafizəsi, insanların sağlam ekoloji mühitdə yaşaması və yaşıllıqların genişləndirilməsi istiqamətində ardıcıl tədbirlər görülür. Hər il Abşeronun kənd və qəsəbələrində yüz hektarlarla yeni yaşıllıq zolaqları, meyvə bağları salınır.
Abşeron rayon İcra Hakimiyyəti Başçısının tapşırığına əsasən Abşeron rayonunun kənd və qəsəbələrində növbəti iməçilik aksiyasına başlanılıb.
Abşeron rayon İcra Hakimiyyəti tərəfindən 10 mart 2017-ci il tarixində rayonun Görəddil-Fatmayi-Mehdiabad-Novxanı kəndlərində avtomobil yolunun kənarlarında salınmış yaşıllıq sahələrində iməcilik keçirilib.
İməcilikdə Abşeron RİH-in I müavini Məhəmməd Həsənov , Abşeron RİH-in müavini İlham Quliyev və RİH-in əməkdaşları ilə yanaşı, Abşeron rayon İxtisaslaşdırılmış Təmir-Abadlıq İdarəsinin, bələdiyyələrin ümumilikdə 250-ə yaxın nümayəndəsi iştirak edib.
Aksiyada adı çəkilən ərazilərdə abadlıq işləri aparılıb, yaşıllıqlara aqrotexniki qulluq göstərilib, ağacların dibi yumşaldılıb, ərazi alaq otlarından təmizlənib.
Aksiya çərçivəsində Görəddil-Fatmayi-Mehdiabad-Novxanı kəndlərinin ərazisi ətraf mühit, insan sağlamlığı üçün zərərli olan müxtəlif məişət və polietilen tullantılarından təmizlənib. Məişət tullantılarının ətrafa yayılmasının qarşısını almaq, eləcə də onların daşınmasının asanlaşdırmaq məqsədilə aparılan təmizlik işlərinə 3 Kamaz, 4 xüsusi təyinatlı maşın cəlb olunub. Təmizlik işləri çərçivəsində ərazidən toplanan məişət tullantıları xüsusi nəqliyyat vasitələri ilə ərazidən daşınıb.
Mart ayının axırına qədər davam edəcək aksiya çərçivəsində rayonun kənd və qəsəbə yollarının kənarlarnıda da yaşıllıqlar salınacaq.
Şamo Əliyev
