Novruz bayramı ilə əlaqədar Abşeron rayonunda ənənəvi olaraq imkansız ailələrə bayram sovqatı paylanıb. Xalqımızın əziz bayramlarından olan Novruz Azərbaycanda böyük təmtəraqla keçirilir. Bayram Abşeron rayonunda da geniş şəkildə qeyd olunur. Əlamətdar bayramın rayonda təntənəli və yaddaqalan olması ilə bağlı rayon icra hakimiyyəti tərəfindən müvafiq tədbirlər planı hazırlanıb və onun icrası müvəffəqiyyətlə həyata keçirilir.
Bayram ərəfəsində rayonda geniş abadlıq quruculuq işləri, o cümlədən qəsəbələrdə, istirahət parklarında, həyətlərdə, küçələrdə təmizlik işləri aparılıb. Orta və məktəbəqədər təhsil müəssisələrində baharın gəlişinə həsr olunmuş tədbirlər, rayonun qəsəbə mədəniyyət evləri, digər mədəniyyət ocaqlarında bayram tamaşaları hazırlanıb.
Novruz bayramına həsr olunmuş tədbirlər çərçivəsində rayonda yaşayan şəhid, əlil, veteran, kimsəsiz və aztəminatlı ailələr, məcburi köçkünlərə qayğı diqqət mərkəzində saxlanılıb. Abşeron Rayon İcra Hakimiyyəti tərəfindən əziz bayram münasibətilə rayonda yaşayan aztəminatlı ailələr üçün zəruri ərzaqlardan ibarət bağlamalar təqdim edilib.
Abşeron rayon İcra Hakimiyyəti başçısının Ərazi idarəetmə və yerli özünüidarəetmə orqanları ilə iş şöbəsinin müdiri Azər Məmmədov tədbir iştirakçılarını sevimli Novruz bayramı münasibətilə təbrik edib, bu günlərdə ehtiyacı olan hər bir vətəndaşa kömək göstərilməsinin əhəmiyyətini xüsusi olaraq vurğulayıb.
Əziz bayramla əlaqədar rayon icra hakimiyyətinin təşkilatçılığı ilə hazırlanmış ərzaq bağlamaları, ilk növbədə, yardıma ehtiyacı olan ailələrə – şəhid, əlil, ərazidə yerləşən yataqxanada yığcam halda məskunlaşmış məcburi köçkün ailələri, tənha, kimsəsiz və s. aztəminatlı ailələrin üzvləri üçün nəzərdə tutulub və növbəti 2 gün ərzində ümumilikdə 350-dən çox ailəyə təqdim olunacaqdır.
Göstərilən diqqət və qayğıya görə şəhid ailələri, Qarabağ müharibəsi əlilləri və digər aztəminatlı ailələr prezident İlham Əliyevə və rayon rəhbəri İradə Gülməmmədovaya minnətdarlıqlarını ifadə ediblər.
Şamo Əliyev
