Xırdalan şəhər 1 saylı uşaq bağçası Abşeron Rayon İcra Hakimiyyətinin daxili imkanları hesabına əsaslı təmirdən sonra bu gün yenidən istifadəyə verilib. Abşeron rayon İcra Hakimiyyəti başçısı İradə Gülməmmədova əsaslı təmirdən sonra istifadəyə verilən uşaq bağçasına gəlib. İlk olaraq 1 saylı uşaq bağçasının əsaslı təmirdən sonrakı açılış mərasimi keçirilib. Bağçanın müdiri Vüsalə Məşədiyeva Rayon rəhbərinə bağça və onun təmiri, öncəki çatışmazlıqlar, hazırkı vəziyyət və qruplarla bağlı ətraflı məlumat verərək deyib ki, 1970-ci ildə inşa olunan bağça binası heç vaxt təmir olunmadığı üçün burada uşaqlar və müəllimlər üçün təhlükəli vəziyyət yaranmışdı. Hazırda isə bina əsaslı şəkildə təmir olunub. 75-dən çox uşaq üçün nəzərdə tutulan bağçada isti, sağlam və təhlükəsiz şərait yaradılıb. Müəssisənin həyətində də abadlıq və quruculuq işləri görülüb, ərazi asfaltlanıb, müasir işıqlandırma sistemi quraşdırılıbdır.Binanın foyesində ulu öndər Heydər Əliyevin, dövlət başçısı İlham Əliyevin və Heydər Əliyev Fondunun prezidenti Mehriban Əliyevanın uşaqlara göstərdikləri diqqət və qayğını əks etdirən fotolardan ibarət guşə yaradılıb. Hazırda bağçada uşaqların təlim-tərbiyəsi ilə məşğul olmaq, onların istirahətini yüksək səviyyədə təşkil etmək üçün hər cür şərait var. Məktəbəqədər təhsil ocağının bütün dəhliz və otaqlarının divarlarında uşaqların böyük marağına səbəb olan nağıl qəhrəmanlarının obrazları həkk edilib. Uşaqların maraqları nəzərə alınaraq bağçanın həyətində xüsusi istirahət guşəsi də yaradılıb.
İcra başcısı İradə Gülməmmədova ayrı-ayrı otaqlara baxıb, görülən işlərin keyfiyyəti ilə maraqlanıb. İcra başçısı vəsaitlərdən düzgün istifadə olunması, uşaqların sağlamlığına və qidalanmasına ciddi nəzarət olunması, təmizliyə, gigiyenik tələblərə lazımi şəkildə əməl edilməsi barədə tapşırıqlar verib.
Bağça ilə tanışlıqdan sonra uşaqların ifasında vətənə, dövlətçiliyə, anaya həsr olunmuş şerlər, mahnılar, eləcə də nümayiş etdirilən milli və xarici rəqs nömrələri alqışlarla qarşılanıb.
Sonda görülən işlərdən razı qalan İradə Gülməmmədova bağçanın kollektivinə uğurlar arzulayıb və uşaqlarla xatirə şəkili çəkdirib.
Şamo Əliyev
