Abşeron rayon İcra Hakimiyyətinin təşəbbüsü ilə Mehdiabad qəsəbəsində iftar süfrəsi açılıb. Məclisdə 250 oruc tutan şəxs iştirak edib.
Xeyriyyə tədbirində dindarlarla yanaşı, imkansız şəxslər, qocalar, şəhid ailələrinin üzvləri, veteranlar, məcburi köçkünlər, kimsəsizlər də iştirak ediblər.
Mərasimdə qəsəbə bələdiyyəsinin sədri Əbülfət Nuriyev iftar süfrəsində iştirak edənləri salamlayaraq qarşıdan gələn bayram münasibəti ilə təbrik edib. Ramazan ayının həmrəylik, dostluq, qardaşlıq, sevgi, mərhəmət və ruzi-bərəkət ayı olduğunu bildirib. Azərbaycanda və eləcə də Abşeron rayonunda açılan bu iftar süfrələrinin ölkəmizdə ənənəvi tolerantlığı nümayiş etdirdiyini vurğulayıb.
Sonra qəsəbə İcra nümayəndəsi Bayram İbrahimov mərasim iştirakçılarına bu əziz gündə niyyətlərinin həyata keçməsini diləyib. Həmçinin göstərilən diqqqətə görə rayon rəhbərliyinə minnətdarlığını ifadə edib.
İftar axşamında qəsəbə sakini Niyaməddin Orduxanlı, Qarabağ əlillərindən Abuzər Abbasov, Elçin Cabbarov, Etibar Ağakişiyev, şəhid ailəsi Həsən İsmayılov çıxış edərək Ramazan ayı münasibətilə müsəlmanlara göstərilən diqqət və qayğıya görə Abşeron rayon İcra Hakimiyyətinin başçısı İradə Gülməmmədovaya minnətdarlıqlarını bildirdilər.
İftar süfrəsi ətrafında on bir ayın sultanı olan Ramazanın fəzilətlərindən danışılıb, bu ayda görülməsi vacib olan xeyirxah əməllərdən, savab işlərdən söz açılıb, şəhidlərimizin ruhuna dualar oxunub. Növbəti Ramazan bayramının Qarabağ torpaqlarında keçirilməsi arzulanıb.
Şamo Əliyev
