24 saylı uşaq bağçasında “Milli Musiqi günü” münasibətilə "açıq məşğələ" keçirildi. Sentyabrın 18-də Azərbaycan xalqının dahi oğlu, musiqi mədəniyyətimizin korifeyi Üzeyir Hacıbəylinin doğum günüdür. Həmin gün sadəcə musiqisevərlərin yox, həm də xalqımızın bayramıdır. 1995-ci ildə isə ulu öndər Heydər Əliyevin Prezident fərmanı ilə dahi bəstəkarın anadan olmasının 110 illik yubileyi ərəfəsində 18 sentyabrın Milli Musiqi Günü kimi qeyd olunması qərara alındı.
18 sentyabr 2017-ci il tarixində 24 saylı körpələr evi–uşaq bağçasında dünya şöhrətli bəstəkar, görkəmli musiqişünas alim, publisist, dramaturq, pedaqoq və ictimai xadim, müasir Azərbaycan peşəkar musiqi sənətinin və milli operasının banisi Üzeyir Hacıbəylinin anadan olmasının 132 illiyinə həsr olunmuş açıq məşğələ kecirildi. Toplantıda Abşeron bağçalarının müdirələri və əməkdaşları, 24 saylı bağçanın işçiləri, uşaqlar istirak edirdilər.
Tədbiri açıq elan edən bağçanın müdiri Leyla Bayramova Üzeyir Hacıbəylinin milli musiqinin formalaşmasındakı əvəzedilməz rolundan danışdı. Bildirdi ki, Üzeyir Hacıbəylinin opera sənəti, opera dramaturgiyası sənət tariximizdə tamamilə yenilik idi və bu sənət faktiki olaraq Yaxın Şərqdə ilk dəfə Azərbaycanda yarandı. Qeyd edildi ki, Üzeyir Hacıbəylinin əsərləri həm də xalqın azadlıq mübarizəsinə xidmət etmiş ictimai məzmunlu, milli koloritli, tərbiyəvi əsərlərdir, korifey sənətkar eyni zamanda Azərbaycan himninin möhtəşəm musiqisinin müəllifidir.
Musiqi sədaları altında zala daxil olan uşaqlar tədbir iştirakçılarını salamladıqdan sonra məşğələ başladı. Bağçanın uşaqları ilə "açıq məşğələ"ni musiqi rəhbəri Lalə Ələsgərova aparırdı.
Açıq məşğələdə məktəbəhazırlıq qrupunun uşaqları dahi bəstəkarın “Şəfəq Sökülərkən” mahnısını ustalıqla ifa etdilər. Məşqələdə həmçinin uşaqlarla tərbiyəci musiqi alətlərinə aid səssiz oyun nümayiş etdirdilər.
Tədbirin sonunda dahi bəstəkar Üzeyir Hacıbəylinin həyatından bəhs edən videoçarx nümayiş olundu. Bağçanın balaca sakinləri nümayiş edilmiş videoçarx üzrə test tapşırığı yerinə yetirdilər.
Şamo Əliyev
