Abşeron Rayon Mərkəzi Xəstəxanasının tədbirlər planına uyğun olaraq əhali arasında keçirilən növbəti marifləndirici tədbir Masazır həkim məntəqəsində baş tutub.
Kənd sakinlərinin və gənc anaların iştirak etdiyi toplantının 1-ci hissəsində çıxış edən Masazır həkim məntəqəsinin Baş həkimi Zibaxanım Nuriyeva düzgün qidalanmanın əsas prinsiplərindən danışıb, sağlam həyat tərzinin formalaşdırılması üçün gündəlik qida rasionunda zülallar, karbohidratlar və yağlardan necə istifadə olunması, meyvə və tərəvəzlərin faydaları barədə dəyərli məsləhətlər verib. Z.Nuriyeva bildirib ki, rasional və vaxtlı-vaxtında qidalanma uşaqların səhhətini və həmahəng inkişafını təmin edən ən vacib və təsirli, ilkin şərtlərdən biridir. Qidalanma beyinin, uşaq idrakının, mərkəzi sinir sisteminin funksional vəziyyətinə xeyli təsir göstərir. Düzgün qidalanma müxtəlif xəstəliklərə qarşı orqanizmin davamlılığını artırır.
Tədbirin 2-ci hissəsində Masazır həkim məntəqəsinin ailə həkimi Həmayə Quliyeva yığınçaq iştirakçılarına kəskin respirator xəstəliklər haqqında geniş məlumat verib.
H. Quliyeva qeyd edib ki, bu xəstəlikdən qorunmaq üçün insanların sıx olduğu ərazilərdən uzaq durmaq, xəstə insanlarla ünsiyyətdən qaçmaq, ictimai nəqliyyatdan istifadə etdikdə ağzı qapalı saxlamaq vacibdir. Ailə həkiminin sözlərinə görə, uşaqların immun sistemini təbii vasitələrlə qaldırmaq lazımdır: “İmmunomodulyatorlardan çox uşağı meyvə, tərəvəzlə qidalandırmaq, bu yolla onun orqanizmini xəstəliklərə davamlı, müqavimətli etmək lazımdır. Eyni zamanda uşaqları soyuq havadan qorumaq, xüsusilə boğazında iltihaba meylli badamcığı olan uşaqların virus yayılan yerlərdə, xəstə uşaqlarla təmasını minimuma endirmək vacibdir”.
Şamo Əliyev
