Həm bugünkü, həm də gələcək nəsil Abşeronlular, şuşalılar,laçınlılar, kəlbəcərlilər, bütün xalqımız İradə Gülməmmədova və onun kimi xalqa, vətənə sədaqətlə xidmət edən nümunəvi dövlət qulluqçularının həqiqi dəyərini, layiq olduğu qiyməti verəcəkdir Abşeron rayonunda şəhid ailələrinə, Qarabağ əlillərinə, ümumilikdə müharibə təbəqəsinə olan diqqət və qayğı yüksək səviyyədədir.
Həqiqətən də Abşeron RİH-nin başçısı İradə Gülməmmədovanın əhalinin həssas kateqoriyadan olan təbəqəsinə istiqanlı münasibəti bütün respublika ictimaiyyəti tərəfindən təqdir olunur. Onu dərindən tanıyanlar İradə xanımın həddən artıq vətənə, dövlətə, torpağa bağlı olduğunu deyirlər. Bu da səbəbsiz deyildir. Çünki İradə xanım əslən Şuşa rayonundandır. Onun da doğma yurdu düşmən işğalı altındadır. Bu qədər itkiyə məruz qalmış, ağrı-acı keçirmiş, dərdə sinə gərmiş adamın müqəddəs savaşa başlamaq üçün Ali Baş Komandanın əmri olunca həmdərdlilərinə diqqət və qayğı göstərməkdən başqa hansı təsəllisi ola bilər ki? İradə Gülməmmədova da daşıdığı vəzifəni insanlara yaxşılıq etmək üçün ona verilmiş fürsət kimi dəyərləndirir, “Mən xalqımın bir nömrəli xidmətçisiyəm”-deyən Azərbaycan Respublikasının Prezidenti cənab İlham Əliyevin fərman və sərəncamlarını, tövsiyə və tapşırıqlarını əldə rəhbər tutur, dövlətimizin qayğılı münasibətini Abşeron vətəndaşlarına ötürmək vəzifəsinin öhdəsindən layiqincə gəlir.
Müharibənin qoyduğu “nişanələrdən” biri də şəhidlər xiyabanlarıdır. Bu gün Abşeron rayonunda çoxlu sayda şəhidlərin uyuduqları və yaxud onların xatirəsinə salınmış şəhidlər xiyabanları vardır. Çox təəssüflər olsun ki, bu müqəddəs yerlər baxımsızlıq ucbatından pis hallara düşmüşdü və bu da təbii ki, həm şəhid ailələrini, həm də bütövlükdə rayon sakinlərini bərk narahat edirdi. Rayon İcra Hakimiyyətinin Başçısı İradə Gülməmmədova yaranmış bu vəziyyəti nəzərə alaraq təcili tədbirlərin görülməsi barədə tapşırıqlar vermişdir. Rayon ərazisində olan şəhidlər xiyabanlarının əsaslı şəkildə təmir olunması və onların adlarına layiq hala salınması istiqamətində əməli işlər görülmüşdür. Rayon mərkəzində yerləşən şəhidlər xiyabanı əsaslı şəkildə yenidən qurulmuşdur. Eyni zamanda, Saray və Aşağı Güzdək, Mehdiabad qəsəbələrində xiyabanlar da şəhidlərin adlarına layiq hala salınmışdılr. Hal-hazırda digər kəndlərdə olan şəhidlər xiyabanlarında da bu istiqamətdə işlər görülür.
Hər il Azərbaycanın şəhər və rayonlarının işğal günlərində həmin bölgələrdən olan şəhid ailələri ilə Rayon İcra Hakimiyyətinin başçısı İradə Gülməmmədova gürüşlərin keçirilir ki, bunun da məqsədinin işğal altında olan ərazilərimizin təbliğ edilməsi, onların unudulmamasına çalışmaqdır.
Amma çox təəssüflər olsun ki, ölkəmizdəki və respublikanın modern inkişaf etməkdə olan əyaləti Abşeronda gedən tərəqqi proseslərini gözü götürməyən destruktiv qüvvələr və onlara xidmət edən bəzi “ağzıgöyçək” KİV bu tərəqqiyönlü proseslərə əyri prizmadan baxır, İ. Gülməmmədovanın xidmətlərinə kölgə salmağa, nəticə etibarilə Azərbaycanın daxilində qarmaqarışıqlıq yaratmağa, ölkəmizin beynəlxalq imicinə xələl gətirməyə çalışırlar. Ancaq hamıya məlumdur ki, belə cəhdlər uğursuzluğa məhkumdur. Çünki müdrik Azərbaycan xalqının gözü tərəzidir, ağı qaradan, yaxşını pisdən seçməyi bacarır. Həm bugünkü, həm də gələcək nəsil Abşeronlular, şuşalılar,eləcə də digər köçkün rayonun vətəndaşları, bütün xalqımız İradə Gülməmmədovanın və onun kimi xalqa, Vətənə sədaqətlə xidmət edən nümunəvi dövlət qulluqçularının həqiqi dəyərini, layiq olduğu qiyməti verəcəkdir. Qoy bu yazı da həmin qiymətə daha bir müsbət əlavə olsun.
Şamo Əliyev