Bu gün Abşeron rayonu Perəkəşkül qəsəbəsində yerləşən Müdafiə Nazirliyinin N saylı hərbi hissəsində Abşeron Rayon İcra Hakimiyyətinin dəstəyi ilə əsgərlər üçün Novruz şənliyi təşkil edilib.
Tədbirdə Abşeron Rayon İcra Hakimiyyətinin başçısı İradə Gülməmmədova, Müdafiə Nazirliyinin və Respublika Hərbi Prokurorluğunun əməkdaşları, rayonun hüquq mühafizə orqanlarının rəhbərləri, Qarabağ müharibəsi vetiranları, hərbi hissənin şəxsi heyəti iştirak edib.
Toplantı iştirakçıları əvvəlcə torpaqlarımızın azadlığı uğrunda canından keçmiş şəhidlərin ruhunu bir dəqiqəlik sükutla yad edib, sonra əsgər və zabitlərlə birlikdə Azərbaycan Respublikasının himnini oxunub.
Şəxsi heyyətlə keçirilən görüşdə çıxış edən İradə Gülməmmədova Novruz bayramı münasibətilə əsgərləri təbrik edib, onlara çətin və şərəfli xidmətlərində müvəffəqiyyətlər arzulayıb. İcra başçısı bildirib ki, hər bir azərbaycanlının ən böyük arzusu Ermənistan tərəfindən işğal olunmuş torpaqlarımızın azad olunması və bayrağımızın Dağlıq Qarabağda dalğalanmasıdır:
“Bunun üçün hər birimiz üzərimizə düşən vəzifələri layiqincə yerinə yetirməliyik. Mən inanıram ki, o gün uzaqda deyil və biz Ali Baş Komandan, Prezident İlham Əliyevin rəhbərliyi altında torpaqlarımızı işğaldan azad edəcəyik.
Ali Baş Komandan İlham Əliyev ulu öndərin ideyalarını layiqincə yerinə yetirərək ordu quruculuğu sahəsində öz səylərini daha da artırıb, Azərbaycan Silahlı Qüvvələrinin müasir hərbi texnika ilə təchiz edilməsinə, möhkəm nizam-intizam, yüksək döyüş ruhu ilə seçilən, düşmənə sarsıdıcı zərbə vurmağa qadir olan bir ordu yaradılmasına nail olub”.
“İnşallah gələn bayramlarımızı işğaldan azad edəcəyimiz Dağlıq Qarabağımızda, Şuşada, Xankəndində, Xocalıda və işğal altında olan digər o gözəl bölgələrimizdə qeyd edək. Öz evlərindən zorla qovulmuş məcburi köçkün bacı və qardaşlarımız öz evlərində bayram süfrələrini qura bilsinlər. Bax bu bayram tonqallarını Cıdır düzündə yandıraq”, - icra başçısı deyib.
Hərbi hissənin komandanlığı Abşeron Rayon İcra Hakimiyyəti başçısı İradə Gülməmmədovanın bayram gününü əsgərlərlə birlikdə keçirməsini yüksək qiymətləndirərək belə görüşlərin əsgərlər üçün mənəvi dəstək rolu oynadığını, onlarda ruh yüksəkliyi yaratdığını, əsgər və zabitlərin Ali Baş Komandanın əmr və tapşırıqlarına sözsüz hazır olduqlarını ifadə edib, düşmən üzərində qələbənin uzaqda olmadığını bildirib
Bayram tədbirində Sumqayıtın hərbi prokuroru hərbçilərə respublika hərbi prokuroru Xanlar Vəliyevin təbrikini çatdırıb. Sonra Müdafiə Nairliyinin zabiti çıxış edərək əsgər və zabitləri Novruz bayramı münasibəti ilə təbrik edib, Müdafiə naziri, general-polkovnik Zakir Həsənovun əsgər və zabitlərə təbrikini oxuyub.
Şənlikdə əsgərlərə Novruz bayramı münasibətilə bayram sovqatı verilib və konsert proqramı təşkil edilib.
Sonda əsgər yeməkxanasına baş çəkilib və İradə Gülməmmədova əsgər yeməyindən dadıb.
Şamo Əliyev