Abşeron rayon İcra Hakimiyyətinin başçısı İradə Gülməmmədova Xırdalan şəhərində yerləşən 15 saylı körpələr evi-uşaq bağçasında əsaslı təmirdən sonra yaradılan şəraitlə tanış olub.
Bağçanın müdirəsi Mətanət Novruzova məlumat verərək bildirib ki, bu bağça 1975-ci ildən fəaliyyət göstərir. 2005-ci ildə körpələr evi-uşaq bağçasının binasında cari təmir işləri aparılsa da məktəbəqədər təhsil müəssisəsinin təmirə ehtiyacı var idi. Burada ötən ilin dekabr ayında başlanılan təmir nəticəsində uşaq tərbiyə müəssisəsində lazımi şərait yaradılıb.
İkimərtəbəli körpələr evi-uşaq bağçası 12 qrupdan ibarətdir. Bu qrupların hər biri lazımi inventarla təchiz edilib. 230 uşaq yerlik müəssisə azyaşlı sakinlərin zövqünə uyğun qurulub, onların rahatlığını, istirahətini və ilkin biliklərə yiyələnmələrini təmin edir. Üçkorpuslu məktəbəqədər təhsil müəssisəsində balacaların təlim-tərbiyəsi ilə məşğul olmaq, həmçinin onların bacarıq və istedadlarını aşkara çıxarmaq üçün hərtərəfli şərait yaradılıb. Bundan başqa, uşaq müəssisəsinin ətrafındakı ərazidə də abadlıq işləri görülüb.
Daha sonra İ.Gülməmmədova ayrı-ayrı otaqlara baxıb, görülən işlərin keyfiyyəti ilə maraqlanıb. İcra başçısı vəsaitlərdən düzgün istifadə olunması, uşaqların sağlamlığına və qidalanmasına ciddi nəzarət olunması, təmizliyə, gigiyenik tələblərə lazımi şəkildə əməl edilməsi barədə tapşırıqlar verib.
Sonda görülən işlərdən razı qalan icra başçısı bağçanın kollektivinə uğurlar arzulayıb
Məlumat üçün bildirək ki, uşaq bağçasının mövcud vəziyyəti və burada tərbiyə alan uşaqların sayı nəzərə alınaraq Abşeron Rayon İcra Hakimiyyətinin daxili imkanları hesabına həmin məktəbəqədər tərbiyə müəssisəsinin I korpusunda əsaslı təmir işləri aparılıb. Təmir zamanı bağçadakı böyük və orta qruplarda elektrik xətləri dəyişdirilib, divarlar rənglənmiş, döşəməyə lak çəkilmiş, pəncərələrin kənarına aqlay vurulmuş, qapı və pəncərələr, döşəmə, tavan, sanitariya qovşaqları təzələnib.
Şamo Əliyev
