“Azərduz” İstehsalat Birliyinin fəaliyyət göstərdiyi Masazır duz gölünün ekoloji təmizliyinin təmin edilməsi ilə bağlı Abşeron rayon İcra Hakimiyyətnin başçısı İradə Gülməmmədovanın müvafiq dövlət qurumları qarşısında qaldırdığı məsələnin nəticəsi olaraq, cənab İlham Əliyevin verdiyi tapşırıq əsasında Masazır və Novxanı kəndləri ərazisində çirkab suların axıdılması üçün 13.2 km xəttin çəkilişi başa çatdırılmış, hazırda nasosxananın inşası işləri sürətlə davam etdirilir. Tikinti quraşdırma işlərinin yaxın günlərdə tamamilə başa çatdırılaraq, istifadəyə verilməsi nəzərdə tutulur.
Məlumat üçün bildirək ki, Masazır və Novxanı qəsəbələrindən süzülüb gələn çirkab sular birbaşa duz gölünə tökülürdü.Gölə axıdılan çirkab sular əsasən sakinlərin sıx yaşadığı massivlərdən gəlirdi. Yağış yağanda isə vəziyyət daha da pisləşirdi. Dövlət proqramı əsasında çəkilən kanalizasiya xətti həmin problemin aradan qaldırılmasına tam imkan verəcək. Hazırda layihəyə uyğun olaraq Duz gölünün hər üç tərəfindən axıdılan çirkab sularının qarşısı alınır.Çirkab sular yeni inşa olunan xəttə birləşdiriləcək və Novxanıda inşa olunmuş kollektora qoşulacaq.
Şamo Əliyev
