Rayonun hüquq-mühafizə orqanları rəhbərlərinin də iştirak etdiyi görüşdə balaça şahmatçını təbrik edən Abşeron rayon İcra Hakimiyyətinin başçısı İradə Gülməmmədova, Ümid Aslanovun belə mötəbər yarışda qələbə qazanmasının ölkə idmanı adına əhəmiyyətini vurğulayıb. Rayon rəhbəri gələcək yarışlar üçün Ümid Aslanova öz tövsiyyələrini verib. Xanım başçı həmçinin Ümidin xarici dili öyrənməsi üçün fərdi qaydada ödənişsiz ingilis dili kursuna yazılmasını öz üzərinə götürüb.
Bundan önçədə Amerika, Gürcüstan, Yunanıstan və Bolqarıstanda keçirilən beynəlxalq turnirlərdə fəxri kürsünün ən yüksək pilləsinə qalxdığını vurğulayan Ümid Aslanov bildirib ki, Qazaxıstanın Aktau şəhərində keçirilən beynəlxalq şahmat turnirində yarışın qalibləri sırasında oda yer alıb. O, Vətənə qızıl və gümüş medalla qayıdıb.
Ümidin 5 yaşından etibarən Azərbaycanda və beynəlxalq yarışlarda keçirilən turnirlərdə, çempionatlarda dəfələrlə birinci yer tutduğunu vurğulayan çempionun atası Fuad Aslanov qeyd edib ki, blits turnirində 11 oyuna çıxan 12 yaşlı Ümid bu qarşılaşmaların hamısında da qələbə qazanıb. Yarışın rapid turnirində isə yeddi oyuna çıxan Ümid bu qarşılaşmaların 7-də qələbə qazanıb. Bir oyunu heç-heçə başa vurub, birində isə məğlub olub.
Rayonda idmançılara, o cümlədən şahmatçılara göstərilən diqqət və qayğıya görə İradə Gülməmmədovaya minnətdarlığını bildirən Fuad Aslanov son illərdə respublikamızın hər yerində olduğu kimi, Abşeron rayonunda da idmanın bu növünün inkişaf etdiyini vurğulayıb.
Görüşün sonunda İ.Gülməmmədova tərəfindən Ümid Aslanova qiymətli hədiyyə və pul mükafatı təqdim edilib.
Şamo Əliyev
