Oktyabrın 15-də Abşeron rayonunda Yeni Azərbaycan Partiyası (YAP) Qadınlar Şurasının təşəbbüsü ilə görüş keçirildi.
Abşeron rayonu Yeni Azərbaycan Partiyasının binasında Yeni Azərbaycan Partiyasının Abşeron rayonundan olan qadın üzvlərinin iştirakı ilə keçirilən tədbirdə qarşıdakı bələdiyyə seçkilərində qadınların fəal iştirakının təmin edilməsi əsas müzakirə mövzusu oldu. Görüşdə bələdiyyə seçkiləri ilə yanaşı, şuranın, ümumilikdə, gələcək fəaliyyət istiqamətlərinin müəyyənləşdirilməsi, qarşıda duran vəzifələr ətrafında səmərəli fikir mübadiləsi aparılıdı.
Tədbirdə çıxış edən RİH-i başçısının birinci müavini İradə xanım Gülməmmədova bildirdi ki, bələdiyyə seçkilərində qadınların təmsilçiliyi qarşıda duran prioritet məsələlərdəndir. Diqqətə çatdırıldı ki, hazırda YAP üzvlərinin 40 faizdən çoxu qadınlardır. Hazırkı bələdiyyə üzvlərinin isə təxminən 30 faizini qadınlar təşkil edir. Halbuki ilk bələdiyyə seçkilərində bu göstərici olduqca aşağı idi. Aparılan məqsədyönlü dövlət siyasəti nəticəsində, ötən müddət ərzində Azərbaycanda qadınların müxtəlif idarəetmə strukturlarında təmsilçiliyi müsbət istiqamətdə dəyişib. Bu gün Azərbaycan qadını ictimai-siyasi proseslərdə fəal iştirak edir, xüsusilə dövlət idarəçiliyində geniş təmsil olunur.
Qeyd edildi ki, belə bir şəraitdə qadınların bələdiyyələrdə təmsilçiliyi məsələsi də günün tələbi kimi meydana çıxır. Bələdiyyələr daha çox əhalinin sosial məsələləri ilə məşğul olan qurumdur. Bu baxımdan qadınların yerli özünüidarəetmə orqanlarında təmsilçiliyi ana şəfqəti, ana diqqəti, ana ədalətinin bu quruma gətirilməsi deməkdir.
Tədbirdə YAP Qadınlar Şurasının sədri Təyyubə xanım Hüseynova qeyd etdi ki, Azərbaycanın birinci xanımı, Heydər Əliyev Fondunun prezidenti Mehriban Əliyevanın fəaliyyəti bu gün qadınlarımız üçün əsl nümunədir. Öz növbəsində həmçinin qeyd etdi ki, qadınlar elm və təhsil, səhiyyə və mədəniyyət, eləcə də digər sahələrdə qazandığı uğurları ilə öz nüfuzlarını ilbəil artırmağa müvəffəq olub.
Tədbirdə çıxış edən Saray bələdiyəsinin sədr müavini Vəsilə Əbilhəsənova qeyd etdi ki, qadınlar hər zaman Azərbaycanın ictimai-siyasi həyatında aktiv olub və bu mənada 9 oktyabr prezident seçkiləri də istisna olmadı: "Bu gün Azərbaycan qadınının həyatımızın bütün sahələrində əldə etdiyi uğurlar, nümayiş etdirdiyi yüksək göstəricilər ölkəmizdə əsası xalqımızın ümummilli lideri Heydər Əliyev tərəfindən qoyulmuş qadın siyasətinin inkişafının sistemli şəkildə həyata keçirilməsinin məntiqi nəticəsidir. Möhtərəm Prezidentimiz cənab İlham Əliyevin rəhbərliyi ilə Azərbaycan cəmiyyətində qadınların rolunun yüksəldilməsi üçün hərtərəfli şərait yaradılır, ardıcıl tədbirlər həyata keçirilir. Buna görə də qadın problemlərinə dövlət səviyyəsində diqqət və qayğını biz həmişə hiss edirik".
Tədbirdə çıxış edən YAP Qadınlar Şurasının İdarə Heyətinin üzvü Çinarə Sadıxova və digər partiya üzvləri də qadınları qarşıdan gələn bələdiyyə seçkilərində fəal iştirak etməyə çağırdılar.
Görüşdə gender bərabərliyi, erkən nikahlar, hərbi vətənpərvərlik və digər mövzularda da müzakirələr aparıldı.
Baş redaktor: Şamo Əliyev
