Noyabrın 19-da Xırdalan şəhərindəki Heydər Əliyev Mərkəzində “Heydər Əliyev müstəqil Azərbaycanın memarı və qurucusudur” mövzusunda açıq dərs keçirildi.
Açıq dərsdə Xırdalan şəhər 2 nömrəli məktəbinin XI sinif şagirdləri iştirak edirdilər.
“Heydər Əliyev müstəqil Azərbaycanın memarı və qurucusudur” mövzusunda məruzə ilə çıxış edən tarix müəllimi Aqil Məmmədov Ulu Öndərin həyat yoluna qısa nəzər salmış, görkəmli dövlət xadiminin liderlik fəaliyyətindən danışmışdır.
Bildirilmişdir ki, ümummilli lider Heydər Əliyev ölkə həyatının bütün sahələrində quruculuğun, davamlı inkişaf və islahatların banisidir. İqtisadiyyatın yenidən qurulması, aqrar sahənin dirçəlməsi, peşəkar ordu yaradılması, çevik və balanslaşdırılmış xarici siyasət kursu, hüquq və demokratik dövlət quruculuğu Ulu Öndərin adı ilə bağlıdır.
Qeyd edilmişdir ki, bu gün Ümummilli Liderin şah əsəri olan müstəqil Azərbaycan etibarlı əllərdədir və Prezident İlham Əliyevin liderliyi ilə dünyada böyük nüfuz qazanmışdır.
Məktəbin direktor müavinləri Elşən Quliyev və Rasim Hüseyinov Ümummilli Liderin həyat və fəaliyyəti, 1993-cü ildə yenidən siyasi hakimiyyətə qayıtdıqdan sonra gördüyü misilsiz işlər barədə məlumat verərək, şagirdlərin suallarını cavablandırdılar
Abşeron Xəbərə müsahibə verən məktəbin direktoru Ədalət Camalova qeyd etdi ki, Açıq dərslərdə şagirdlər ümummilli lider Heydər Əliyevin həyat və fəaliyyətini dərindən öyrənmiş, onun şərəfli ömür yolunu əks etdirən eksponatlar, fotoşəkil və kitablarla tanış olmuşlar.
Məktəblilərə Azərbaycanın inkişafında, dövlət quruculuğunda və müstəqilliyinin möhkəmləndirilməsində, daxili və xarici siyasət nəticəsində əldə edilən nailiyyətlərdə dahi şəxsiyyət Heydər Əliyevin əvəzsiz xidmətləri barədə ətraflı məlumat verilmişdir.
Açıq dərsdə Azərbaycanın dövlət müstəqilliyinin bərpası XX əsrdə xalqımızın ən böyük nailiyyəti kimi qiymətləndirilmişdir.
Bildirilmişdir ki, ulu öndər Heydər Əliyev xalqın təkidli tələbi ilə hakimiyyətə gəlişindən sonra ölkəmiz sürətli inkişaf yoluna qədəm qoymuşdur.
Vurğulanmışdır ki, ümummilli lider Heydər Əliyevin əsasını qoyduğu uğurlu sosial-iqtisadi inkişaf strategiyası hazırda Prezident İlham Əliyev tərəfindən uğurla davam etdirilir, ölkəmizin beynəlxalq nüfuzu gündən-günə artır.
Bugünki açıq dərsdə 130 nəfər məktəbli iştirak etmişdir.
Baş redaktor: Şamo Əliyev
