Abşeron Rayon İcra Hakimiyyətinin başçısı İradə Gülməmmədova təyin olunduğu ilk gündən kənd və qəsəbələrdə keçirdiyi səyyar görüşlər sakinləri narahat edən məsələlərin öz müsbət həllini tapmasına xidmət edir. İcra başçısının səyyar görüşdə səsləndirilən hər bir məsələyə xüsusi qayğı ilə yanaşması, həlli istiqamətində konkret tapşırıqlar verməsi bunu hər zaman sübut edir. Ötən ayı rayonun Novxanı kəndində keçirilən səyyar görüşdə səsləndirilən məsələnin həll olunması da bu dediklərimizin əyani sübutudur.
İcra başçısının Sentyabrın 28-də rayonun Novxanı kəndində keçirilən səyyar görüşü zamanı sakinlər kəndin Xəlil Rza, Səid Rüstəmov və Hüseyn xan Naxçıvanski küçələrinə kanalizasiya xəttinin çəkilməsi barədə müraciət etmişdilər.
Səyyar qəbul-görüşdə Abşeron Rayon İcra Hakimiyyətinin başçısı İradə Gülməmmədova qaldırılan məsələ və onun həlli istiqamətində aidiyyəti şəxslərə konkret tapşırıqlar verməsi bir daha onu sübut etdi ki, Abşeronda vətəndaş amili hər zaman ön planda olub və bundan sonra da olacaqdır.
Sakinlərlə keçirilən görüş zamanı verilən tapşırıq öz müsbət nəticəsini verib. Belə ki, rayonun daxili imkanları hesabına Novxanı qəsəbəsinin Xəlil Rza, Səid Rüstəmov və Hüseyn xan Naxçıvanski küçələrinə 1000 metr uzunluğunda və 100 mm diametrində yeni borular vasitəsilə kanalizasiya xəttinin çəkilməsi işlərinə başlanılıb.
Kənd sakinlərindən Əli Məmmədov çıxış edərək görülmüş işlərə, xüsusilə də səyyar görüş zamanı yeni kanalizasiya xəttinin çəkilməsi ilə bağlı məsələnin qısa bir vaxtda öz müsbət həllini tapmasına görə rayon rəhbərliyinə kənd sakinləri adından dərin minnətdarlığını bildirib. Qeyd edib ki, həyata keçirilən bütün əməli işlər bir daha onu göstərir ki, bu gün Abşeronda ölkə başçısının siyasətinin əsasını təşkil edən vətəndaş amili ön planda tutulur. Sakinlər tərəfindən səsləndirilən hər xırda bir məsələyə belə həssaslıqla yanaşılır və müsbət həllini tapır.
Şamo Əliyev
