Abşeron Rayon icra hakimiyyətinin başçısı İradə Gülməmmədovanın təşəbbüsü ilə Xırdalan şəhərində 1 yeni park tikiləcək, 2 park isə yeni dizaynda və əsaslı şəkildə yenidən qurulacaq .Bu barədə Abşeron Rayon İcra Hakimiyyəti başçısının Хırdalan şəhər inzibati ərazi dairəsi üzrə nümayəndəsi Rafiq Yusubov “Absheronxeber.az”-a bildirib.O vurğulayıb ki, Xırdalan şəhərində yerləşən 1941-1945-ci illərdə həlak olanların Xatirə Memorial Kompleksi və onun yerləşdiyi park yeni dizaynda qurulacaq. Həmçinin şəhər ərazisində yerləşən “Ana və uşaq parkı”da əsaslı şəkildə müasir standartlar səviyyəsində yenidən inşa ediləcək. Hər iki parkda müasir işıqlandırma sistemləri quraşdırılacaq, dekorativ kol və ağaclar əkiləcək. Əhalinin istirahəti üçün hər cür şərait yaradılacaq.
R.Yusubov qeyd edib ki, Heydər Əliyev prospektində yerləşən Əlillər binası adladırılan binanın qarşısındakı həyətyanı sahədə də möhtəşəm bir park salınacaq ki, burada əlillər və xüsusi qayğıya ehtiyacı olanlar üçün müvafiq şərait yaradılacaq. Parkda müasir işıqlandırma sistemi qurulacaq, bəzək ağacları və gül kolları əkiləcək, yaşıllıq zolağı salınacaqdır.
Hər üç park yerli inşaatçıların qüvvəsi ilə salınacaqdır. Tikintidə 30 nəfərədək işçi çalışacaqdır.
