Koronovirus epidemiyasına qarşı qabaqlayıcı tədbirlərin görülməsi ilə bağlı rayon İcra Hakimiyyəti başçısının sərəncamına əsasən rayonun baş həkimi Mehriban Qaralovanın sədrliyi ilə yaradılmış komissiya fəaliyyətini davam etdirir. Komissiya tərəfindən mütəmadi olaraq COVID-19 infeksiyasının yayılmasının qarşını almaq məqsədilə maarifləndirmə, təbliğat tədbirləri həyata keçirilir. Vaksinasiya prosesi ilə bağlı sakinlər ətraflı məlumatlandırılır, onlara pandemiyaya qarşı mübarizədən irəli gələn tələb və tövsiyələr izah olunur.
28.07.2021-ci il tarixində imzalanmış sərəncamın 7- ci günü Mehriban Qaralova çıxışı zamanı bildirdi ki, bugünkü statistikaya əsasən vaksin olunan vətəndaşların sayı artır, insanlar tərəfindən karantin qaydalarından irəli gələn antisanitar normalara riayət olunur. Komissiyanın sədri qeyd etdi ki, " məni məmnun edən əsas məsələlərdən biri də odur ki, yerlərdə istər sahibkarlar istərsədə sakinlər bizə dəstək olur və bizim keçirdiyimiz reydlər onlar tərəfindən yoxlama kimi deyil, maarifləndirmə və kömək kimi qəbul edilir. Biz artıq sübut etmişik ki, hər zaman onların yanındayıq və onların təhlükəsizliyini, sağlamlığını qorumaq üçün əlimizdən gələni edirik."
Gün ərzində komissiyanın üzvlərinin və işçi qruplarının iştirakı ilə rayon ərazisində fəaliyyət göstərən obyektlərdə, gözəllik salonlarında, sərnişin avtobuslarında, şadlıq evlərində və digər ictimai iaşə obyektlərində baxış keçirilib, sakinlərlə maarifləndirici söhbətlər aparılıb. Avtobus sürücülərinə sərnişinlərin tibbi maskadan istifadə etməsi, sosial məsafənin gözlənilməsi və digər tədbirlərlə bağlı xəbərdarlıq edilməsi məqsədi ilə məsul şəxslərlə görüşüldü və onlara karantin qaydalarından irəli gələn tələblər izah olundu. Rəhbərlik tərəfindən qeyd olunan bütün tədbirlərə riayət ediləcəyi bildirildi.
Həmçinin satıcıların, istehlakçıların, tibbi maskalardan istifadəsinin, sosial məsafənin gözlənilməsinin, ticarət obyektlərinin dezinfeksiyaedici vasitələrlə təmin olunmasının zəruriliyi bir daha bildirilib və karantin qaydalarının pozulması hallarına yol veriləcəyi təqdirdə qanunvericiliyə uyğun olaraq ciddi tədbirlərin görüləcəyi barədə məlumatlandırılıblar. Aşkar edilən nöqsanlar isə yerindəcə aradan qaldırılıb və mövcud qayda və tələblərlə əlaqədar sahibkarlıq subyektlərinin vəzifəli şəxsləri zəruri sosial davranış və sanitar-epidemioloji normalarla bağlı məlumatlandırılıblar.
Xüsusilə qeyd etmək istərdik ki, qabaqlayıcı tədbirlərin nəticələri artıq görünür.
